ওদালগুৰিৰ বৰনগৰ খেলপথাৰত তিনি দিনীয়াকৈ পতা সদৌ বড়ো মহিলা কল্যাণ সংঘ (All Bodo Women’s Welfare Federation -ABWWF)ৰ কেন্দ্ৰীয় সমিতিৰ পঞ্চদশ বাৰ্ষিক সন্মিলনখনৰ আজি সামৰণি পৰে।
আজিৰ মুকলি সভাত মুখ্য অতিথি হিচাপে উপস্থিত আছিল বি টি চিৰ মুখ্য কাৰ্য্যবাহী হাগ্ৰামা মহিলাৰী। মুকলি সভাত নিজৰ ভাষণত মহিলাৰীয়ে মহিলাসকলক পাৰস্পৰিক সহযোগিতাৰ মাজেৰে সবলীকৰণত অংশগ্ৰহণ কৰিবলৈ আহ্বান জনায়।
আনহাতে মহিলাৰীয়ে আজিৰ সভাতো শেহতীয়াভাৱে বি টি চি কৰ্তৃপক্ষই লোৱা ভূমি নীতিৰ ফলত সৃষ্টি হোৱা বিতৰ্ক আৰু অপ্ৰীতিকৰ পৰিস্থিতিৰ বিষয়ে উল্লেখ কৰে।
তেওঁ এইটো তেওঁলোকৰ ভুল হৈছিল বুলি স্বীকাৰ কৰে আৰু শুধৰণি কৰাৰ প্ৰতিশ্ৰুতি দিয়ে। তেওঁ কয় যে ইয়াক ভুলকৈ উপস্থাপন কৰা হ’ল। প্ৰস্তাৱটোৰ সংশোধন ঘটোৱা হ’ব।
উল্লেখযোগ্য যে অলপতে বি টি চি কৰ্তৃপক্ষই লোৱা প্ৰস্তাৱিত ভূমি নীতিয়ে বি টি এ ডিৰ ভিতৰত ইমান দিনে সংৰক্ষিত শ্ৰেণীৰ অধিকাৰ ভোগ কৰি অহা চাওতালী, কোচ ৰাজবংশী, নেপালী, আদিবাসী আৰু নাথ-যোগীসকলক সংৰক্ষিত শ্ৰেণীৰ বাহিৰত ৰখাৰ ব্যৱস্থা কৰিব বুলি বাতৰি ওলাইছিল আৰু তাৰ পৰিপ্ৰেক্ষিতত সমগ্ৰ বি টি এ ডিত ব্যাপক প্ৰতিবাদ হৈছিল।
আনহাতে এই বিষয়টোকে কেন্দ্ৰ কৰি বড়ো সমাজৰ প্ৰতি ছ’চিয়েল মিডিয়াত ঘৃণাজনিত মন্তব্যৰ কঠোৰ সমালোচনা কৰে।
আজিৰ মুকলি সভাত অধ্যক্ষতা কৰিছিল সদৌ বড়ো মহিলা কল্যাণ সংঘৰ সভানেত্ৰী বিভা ৰাণী নাৰ্জাৰীয়ে।
সভাত নন্দিনী আলোচনীৰ সম্পাদিকা মাইনী মহন্ত, ৰাজ্যিক পৰিৱেশ আৰু বন মন্ত্ৰী প্ৰমীলা ৰাণী ব্ৰহ্ম, ৰাজ্যিক জনস্বাস্থ্য কাৰিকৰী, খাদ্য আৰু অসামৰিক যোগান বিভাগৰ মন্ত্ৰী ৰিহন দৈমাৰী, বড়ো সাহিত্য সভাৰ সভাপতি টৰেন বড়োকে ধৰি অন্যান্য বিশিষ্ট লোকসকলো উপস্থিত আছিল।
বক্তাসকলে সমাজত ইতিবাচক পৰিৱৰ্তন আনিবৰ বাবে মহিলা সবলীকৰণৰ ধাৰণাটোত পৰিৱৰ্তন আনিব লাগিব।
