যদিহে নিৰ্বাচন আয়োগে অহা ৩১ জানুৱাৰিত নাগালেণ্ড বিধান সভা নিৰ্বাচনৰ নিৰ্বাচনী জাননী বলৱৎ কৰে তেন্তে নাগা ট্ৰাইবেল হোহোবিলাকে সৰ্বাত্মক নাগালেণ্ড বন্ধ দিব। আজি নাগা ট্ৰাইবেল হোহোবিলাকে ক’ৰ কিমিটীয়ে এই কথা ঘোষণা কৰিছে।
‘যদিহে ভাৰতৰ নিৰ্বাচন আয়োগে অহা ৩১ জানুৱাৰিত নাগালেণ্ড বিধানসভা নিৰ্বাচনৰ নিৰ্বাচনী জাননী জাৰি কৰে, তেন্তে আমাৰ অহা ১ ফেব্ৰুৱাৰিত পথলৈ ওলাই অহা আৰু সৰ্বাত্মক নাগালেণ্ড বন্ধ দিয়াৰ কোনো বিকল্প নাথাকিব।’ নাগা ট্ৰাইবেল হোহো আৰু বেচৰকাৰী সংগঠনবোৰৰ ক’ৰ কমিটীৰ আহ্বায়ক থেজা থেৰীয়ে এইদৰে কয়। তেওঁ এখন সংবাদমেলত এই কথা প্ৰকাশ কৰে।
উল্লেখযোগ্য যে কমিটীৰ আহ্বানৰ প্ৰতি সঁহাৰি জনাই ৰাজ্যখনৰ সকলো ৰাজনৈতিক দলে অহা ২৭ ফেব্ৰুৱাৰিত হ’ব লগীয়া ত্ৰয়োদশ বিধানসভাৰ বাবে মনোনয়ন দাখিল নকৰাৰ সিদ্ধান্ত লৈছে। দলবিলাকে দাবী কৰিছে যে নাগা ৰাজনৈতিক সংকটৰ সমাধান নিৰ্বাচনতকৈ আগতে হ’ব লাগে। এই দাবী কৰি তথা নিৰ্বাচন বৰ্জন কৰাৰ সিদ্ধান্ত ৰাজহুৱা কৰি আজি দুপৰীয়া সৰ্বদলীয় প্ৰতিনিধিসকলে এটা বিবৃতি প্ৰকাশ কৰিছিল। তেওঁলোকে তেওঁলোকৰ প্ৰাৰ্থী হ’ব লগীয়া কোনো লোকৰ নামত টিকট অনুমোদন নকৰে বুলিও কয়। কংগ্ৰেছ, বিজেপিকে ধৰি মুঠ ১১টা ৰাজনৈতিক দলৰ প্ৰতিনিধিয়ে এই বিবৃতিটোত চহী কৰে।
ৰাজনৈতিক দলবিলাকৰ এই ঐক্য প্ৰদৰ্শনক আজি ক’ৰ কমিটিখনে প্ৰশংসা কৰে।
নাগা ট্ৰাইবেল হোহোবিলাকৰ ক’ৰ কিমিটীয়ে কয় যে তেওঁলোকে কাকো মনোনয়ন দাখিল কৰাত বাধা নিদিয়ে, কিন্তু যদি কোনোবাই মনোনয়ন দাখিল কৰে, তেওঁক নাগা বিৰোধী বুলি ঘোষণা কৰা হ’ব।
