মুখ্য মন্ত্ৰী সৰ্বানন্দ সোণোৱালে ৰাজ্যখনৰ মহিলা সকলক সমাজ আৰু চৰকাৰৰ মাজৰ সেঁতু বন্ধনৰ ৰূপত অৱতীৰ্ণ হৈ চৰকাৰী উন্নয়নী আঁচনি সমূহৰ বিষয়ে জনসাধাৰণক জ্ঞাত কৰি জনসাধাৰণৰ সক্ৰিয় অংশ গ্ৰহণেৰে ৰাজ্যখনৰ উন্নয়নী প্ৰক্ৰিয়া ত্বৰান্বিত কৰাৰ বাবে আহ্বান জনায়। বৃহস্পতিবাৰে শ্ৰীমন্ত শংকৰদেৱ কলাক্ষেত্ৰত আয়োজিত সহায়িকা সমাৰোহত মুখ্য অতিথি হিচাপে অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে গৰাকীয়ে এইদৰে কয়।
উল্লেখযোগ্য যে এই ‘সহায়িকা সমাৰোহ’খনি মহিলা প্ৰতিনিধিসকলক চৰকাৰৰ দ্বাৰা ৰূপায়ণ কৰি থকা আঁচনি সমূহৰ ক্ষেত্ৰত উপযুক্ত তথ্য সৰবৰাহেৰে এই ক্ষেত্ৰত উপযুক্ত সজাগতাৰ সৃষ্টিৰ বাবে আয়োজন কৰা হয়।
সমাৰোহখনি ৰাজ্য চৰকাৰৰ সমাজ কল্যাণ বিভাগ আৰু অসম ৰাজ্যিক সমাজ কল্যাম পৰিষদে অ’ এন জি চিৰ সহযোগত অনুষ্ঠিত কৰে।
সমাজত মহিলা সকলে আগবঢ়োৱা বিভিন্ন ভূমিকাৰ ওপৰত আলোকপাত কৰি মুখ্য মন্ত্ৰী গৰাকীয়ে কয় যে চৰকাৰী উন্নয়নী আঁচনি সমূহ অধিক গতিশীল কৰাৰ ক্ষেত্ৰত ৰাজ্যখনৰ মহিলা সকলে বলিষ্ঠ ভূমিকা পালন কৰিব লাগিব।
প্ৰধান মন্ত্ৰী নৰেন্দ্ৰ মোদীয়ে মহিলাৰ নেতৃত্বৰে উন্নয়নৰ বাবে জনোৱা আহ্বানৰ কথা উল্লেখ কৰি মহিলাৰ সৱলীকৰণৰ দিশত ৰাজ্য চৰকাৰে পদক্ষেপ গ্ৰহণ কৰিছে বুলিও মুখ্য মন্ত্ৰী গৰাকীয়ে কয়।
ৰাজ্যখনৰ গ্ৰামাঞ্চলত বসবাস কৰা জনসাধাৰণে চৰকাৰী আঁচনি সমূহৰ বিষয়ে সজাগ নোহোৱাৰ বাবে এই আঁচনি সমূহৰ পৰা বঞ্চিত হোৱা বুলি মুখ্য মন্ত্ৰী গৰাকীয়ে উল্লেখ কৰ।
ফলত মুখ্য মন্ত্ৰী সৰ্বানন্দই মহিলা প্ৰতিনিধি সকলক তৃণমূল পৰ্যায়ত চৰকাৰী উন্নয়নী আঁচনি সমূহৰ বিষয়ে সজাগতা সৃষ্টিৰ কামত নিষ্ঠাৰে ব্ৰতী হোৱাৰ বাবে আহ্বান জনায়। লগতে চৰকাৰী আঁচনি সমূহৰ বিষয়ে জ্ঞাত হোৱাৰ ক্ষেত্ৰত চৰকাৰী বিষয়া সকলৰ সৈতে সঘনাই যোগাযোগ ৰাখিবলৈও আহ্বান জনায়।
সমাৰোহ অনুষ্ঠানটোত মুখ্য মন্ত্ৰীৰ আইন উপদেষ্টা শান্তনু ভৰালী, অসম ৰাজ্যিক সমাজ কল্যাণ পৰিষদৰ অধ্যক্ষা কৃষ্ণা দাস বৰ্মন, সমাজ কল্যাণ বিভাগৰ সঞ্চালক এছ এছ মিনাক্ষী সুন্দৰম, জ্যেষ্ঠ চৰকাৰী বিষয়া, নিকায়, নিগমৰ অধ্যক্ষ, উপাধ্যক্ষ ধৰি অন্যান্য বিশিষ্ট ব্যক্তি সকল উপস্থিত থাকে।
