বনৰীয়া হাতীৰ উপদ্ৰৱৰ পৰা ৰক্ষা পাবলৈ ভাৰত-ভূটান সীমান্তৰ নিৰুপায় আৰু নিঃসহায় গঞাই অৱশেত এটা উপায় বিচাৰি উলিয়াইছে, যিটোৱে হাতী আৰু মানুহ কোনো পক্ষৰে বিশেষ হানি নোহোৱাকৈ সংঘাতৰ অৱসান কৰিব পাৰে। অঞ্চলটোৰ গাওঁবাসীয়ে এতিয়া হাতীৰ বাবে হাবিত হাতীৰ বাবে থৈ আহিছে কলগছ, নিমখ আদি খাদ্য। নিজৰ ঘৰ-দুৱাৰ তথা খেতিপথাৰ নষ্ট কৰাৰ পৰা ৰক্ষা পৰিবলৈ এই উপায়েই ল’লে ওদালগুৰি জিলাৰ ৰাজাগড়, ধৰমজুলি অঞ্চলৰ ৰাইজে। আজি জিলাখনৰ ধৰমজুলি চাহ বাগিচাত থকা এপাল হাতীকো গাওঁবাসীয়ে এইদৰে খাদ্য দিয়া দেখা গ’ল।
উল্লেখযোগ্য যে মানুহৰ বনাঞ্চলত চলা অত্যাচাৰ তথা বেদখলৰ ফলত খাদ্যৰ সংকটত ভোগা বনৰীয়া হাতীয়ে লোকালয়ত প্ৰৱেশ কৰি ভয়ংকৰ সমস্যাৰ সৃষ্টি কৰিছে। লগতে মানুহৰ লগত সংঘাতত লিপ্ত হৈছে। উদাহৰণস্বৰূপে এই বছৰটোত ৰাজ্যখনত হাতী আৰু মানুহৰ সংঘাত উদ্বেগজনকভাৱে বৃদ্ধি পাইছে। এনেকুৱা সংঘাতত আটাইতকৈ বেছিকৈ আক্ৰান্ত হৈছে ওদালগুৰি জিলাৰ ভাৰত-ভূটান তথা অসম-অৰুণাচল সীমান্তৰ অঞ্চল। এই অঞ্চলতে এই ধৰণৰ বহুকেইটা ঘটনা ঘটিছে, যাৰ ফলত হাতীৰ লগতে মানুহৰো মৃত্যু হৈছে। তথ্যমতে এই বছৰটোতে নিচেই কমেও ১১ টা হাতী আৰু সাতজন মানুহৰ মৃত্যু হৈছে হাতী-মানুহৰ সংঘাতৰ পৰিণতিত। কেৱল সেয়াই নহয়, ভূটানৰ পাহাৰ তথা অৰণ্যাঞ্চলৰ পৰা খাদ্যৰ সন্ধানত নামি অহা বনৰীয়া হাতীয়ে অঞ্চলটোৰ কৃষকৰ শ্ৰমৰ ফচল খাই কৃষকৰ বছৰটোৰ শ্ৰম অৰ্থহীনতাত পৰিণত কৰিছে।
শেহতীয়াকৈ থলুৱা সাধাৰণ লোকে বিচাৰি উলিওৱা এই ফৰ্মূলাই কাম কৰিলে এক ডাঙৰ সকাহ পাব হাতী-মানুহৰ সংঘাতত জৰ্জৰিত ৰাজ্যখনে।
