ইলন মাস্কৰ ছ’চিয়েল মিডিয়া সংস্থা এক্সে ভাৰতত ৮ হাজাৰৰো অধিক একাউণ্ট ব্লক কৰি দিছে। এই সকলোবোৰ একাউণ্ট বন্ধ কৰিবলৈ কেন্দ্ৰ চৰকাৰে এক্সক নিৰ্দেশ দিছে। এক্সৰ গ্ল’বেল গভৰ্ণমেণ্ট এফেয়াৰ্ছৰ দলে এই একাউণ্ট বন্ধ কৰাৰ কথা জনাইছে।
পেহেলগামত সংঘটিত সন্ত্ৰাসবাদী আক্ৰমণৰ প্ৰতিশোধ স্বৰূপে পাকিস্তান আৰু পাকিস্তান অধিকৃত কাশ্মীৰৰ সন্ত্ৰাসবাদী ঘাটি ধ্বংস কৰিছে ভাৰতে। পাকিস্তানৰ প্ৰত্যাক্ৰমণত পৰিস্থিতি জটিল হৈ পৰিছে।
এই উত্তেজনাপূৰ্ণ পৰিস্থিতিত বিভিন্ন এক্স একাউণ্টৰ জৰিয়তে উত্তেজনা বিয়পোৱাৰ অভিযোগ উত্থাপন হৈছে। সেইবাবেই ইয়াক বন্ধ কৰাৰ নিৰ্দেশ দিয়া হৈছে। সেই আদেশ অমান্য কৰিলে এক্সৰ বিৰুদ্ধেও কঠোৰ ব্যৱস্থা গ্ৰহণৰ কথা সকীয়াই দিয়া হৈছে।
এই সন্দৰ্ভত এক্সৰ এটা পোষ্টত লিখা হৈছে, “এক্সে ভাৰত চৰকাৰৰ পৰা ৮ হাজাৰৰো অধিক একাউণ্ট বন্ধ কৰাৰ নিৰ্দেশ পাইছে।” এই নিৰ্দেশ যদি এক্সে নামানে তেন্তে বৃহৎ পৰিমাণৰ জৰিমনা বিহা হ’ব আৰু স্থানীয় কৰ্মীসকলক কাৰাগাৰত ভৰোৱা হ’ব বুলিও কেন্দ্ৰই সকীয়াই দিছে। সেই আদেশ মানি চলি এক্সে ইতিমধ্যে এক্সৰ একাউণ্ট বন্ধ কৰিবলৈ আৰম্ভ কৰিছে।
এক্সে উল্লেখ কৰিছে যে এই একাউণ্টসমূহ কেৱল ভাৰততহে বন্ধ কৰা হ’ব। কিন্তু এক্সে এই একাউণ্ট বন্ধ কৰাৰ ক্ষেত্ৰত ভাৰত চৰকাৰৰ সৈতে একমত নহয় বুলিও উল্লেখ কৰিছে।
পেহেলগামত সংঘটিত সন্ত্ৰাসবাদী আক্ৰমণৰ পিছৰে পৰা ছ’চিয়েল মিডিয়াৰ জৰিয়তে উত্তেজনা বিয়পোৱাৰ অভিযোগ উত্থাপন হৈছে। পাকিস্তানৰ পৰা বিভিন্ন চেনেলৰ জৰিয়তে ভাৰত বিৰোধী বাৰ্তা প্ৰচাৰ কৰা বুলি অভিযোগ উত্থাপন কৰিছে ভাৰতে। ইয়াৰ পিছত ভাৰতত কেইবাটাও পাকিস্তানী ছ’চিয়েল মিডিয়া একাউণ্ট ব্লক কৰা হয়। সেই তালিকাত পাকিস্তানৰ মন্ত্ৰী আৰু বিষয়াৰ লগতে কেইবাজনো ৰাজহুৱা ব্যক্তিত্বও আছে।
