গণৰাজ্য দিৱসৰ প্ৰাকক্ষণত অৰুণাচল প্ৰদেশৰ চাংলাং আৰু নামচাই জিলাৰ মাজৰ পিয়োং নামৰ ঠাইত সশস্ত্ৰ বিদ্ৰোহীয়ে এক বৃহৎ আক্ৰমণ সংঘটিত কৰাৰ খবৰ আহিছে। সূত্ৰটোৱে জনোৱামতে বিদ্ৰোহীয়ে এখন সৰু দলং বোমাৰে ওফৰাই দিয়ে।
জানিব পৰা মতে সন্দেহযুক্ত উগ্ৰপন্থীয়ে উগ্ৰপন্থীৰ বিৰুদ্ধে চলোৱা অভিযান সামৰি ঘূৰি অহা সেনাৰ এখন গাড়ীক লক্ষ্য কৰি লৈছিল। সেনাৰ অভিযানকাৰী দলটো অহা গাড়ীখন পাৰ হোৱাৰ ঠিক পিছতেই দলংখন বোমা বিস্ফোৰণত উৰি যায়। অৱশ্যে সেনাৰ গাড়ীখনৰ সামান্য ক্ষতি হোৱাৰ বাদে কোনো জোৱান আহত হোৱা নাই।
আনহাতে সেনাৰ এটা সূত্ৰই এন ই নাওক জনোৱা মতে বোমা বিস্ফোৰণৰ পিছতে সেনা আৰু বিদ্ৰোহী গোটৰ মাজত গুলীয়াগুলী সংঘটিত হয়। সেনাই দাবী কৰা মতে এই গুলীয়াগুলীত সশস্ত্ৰ বিদ্ৰোহীৰ এজন কেডাৰ আহত হৈছে।
উল্লেখযোগ্য যে নামচাই আৰু চাংলাঙৰ মাজৰ এই অঞ্চলটো অসমৰ তিনিচুকীয়া জিলাৰ সীমাত অৱস্থিত। ইয়াৰ অৱস্থানগত সুযোগ লৈ বিভিন্ন সময়ত সশস্ত্ৰ বিদ্ৰোহীসকলে ইয়াৰ আশ-পাশৰ অঞ্চলবোৰত বিভিন্ন কূটাঘাতমূলক কাৰ্য্য সংঘটিত কৰি আহিছে। যোৱা কিছু দিনৰ পৰা বিদ্ৰোহী গোটবোৰে অঞ্চলটোত সঘনে নিজৰ উপস্থিতিৰ প্ৰমাণ কৰি আহিছে।
আনহাতে গণৰাজ্য দিৱসৰ প্ৰাকমুহূৰ্তত এই আক্ৰমণে বিশেষ তাৎপৰ্য্য বহন কৰিছে। আজিৰ আক্ৰমণটোৱে চৰকাৰে দাবী কৰা ধৰণে উজনি অসম তথা ইয়াৰ সীমান্ত অঞ্চলবোৰত নিৰাপত্তা ব্যৱস্থা উন্নত যে হোৱা নাই বা বিদ্ৰোহী গোটবোৰৰ ক্ৰিয়া-কলাপ ৰোধ কৰাত যে চৰকাৰ সফল হোৱা নাই তাৰো প্ৰমাণ দাঙি ধৰিছে। সূত্ৰটোৱে জনোৱামতে অঞ্চলটোৰ লোকসকলৰ মাজত এই ঘটনাই চাঞ্চল্যৰ সৃষ্টি কৰিছে। স্থানীয় নিৰপৰাধী লোকসকল সেনা আৰু সন্ত্ৰাসবাদী উভয়পক্ষৰ পৰা হাৰাশাস্তিৰ সন্মুখীন হোৱাৰ শংকাত ভোগা বুলি সূত্ৰটোৱে জানিবলৈ দিয়ে।
