এজন নিৰ্দোষী সৰল ব্যক্তিৰ জীৱন কাঢ়ি লোৱা এটা যৌন কেলেংকাৰিৰ ঘটনাৰ নতুন মোৰ হিচাপে আজি কৰিমগঞ্জ আৰক্ষীয়ে অভিযুক্ত শ্ৰেয়া পাল নামৰ মহিলাগৰাকীক শিলচৰত গ্ৰেপ্তাৰ কৰিছে। পত্নীৰ সৈতে বহুকেইজনৰ অবৈধ শাৰীৰিক সম্পৰ্ক থকা বাবে আৰু আৰক্ষীৰ ওচৰত তাৰ ন্যায় বিচাৰিও বিনিময়ত মানসিক নিৰ্য্যাতনৰ মুখামুখি হোৱাত হাতাশাত প্ৰত্যয় দাস নামৰ কৰিমগঞ্জৰ লোকজনে যোৱা ১ ডিচেম্বৰত আত্মহত্যাকে বাছি লৈছিল। প্ৰত্যয় দাসৰ আত্মহত্যাৰ পিছত তেওঁৰ দেউতাক প্ৰণয় দাসে পাঁচজনৰ নাম দি কৰিমগঞ্জ আৰক্ষী থানাত এখন এজাহাৰ দাখিল কৰে। তাৰ ভিত্তিত প্ৰত্যয় দাসৰ পত্নীক আজি আৰক্ষীয়ে গ্ৰেপ্তাৰ কৰে। ইয়াৰ পূৰ্বে একেই অভিযোগৰ ভিত্তিত নিপুল আহমেদ নামৰ এজনক কাৰ্বি আংলঙৰ পৰা গ্ৰেপ্তাৰ কৰা হৈছিল। এফ আই আৰ খনত প্ৰণয় দাসে তেওঁৰ পুত্ৰৰ মৃত্যৰ বাবে দায়ী হিচাপে প্ৰত্যয় দাসৰ পত্নী শ্ৰেয়া পাল, পৱন কলিতা, আলম চৌধুৰী নিপুল আহমেদ আৰু ৰোশন হাবিবৰ নাম দিছিল। উল্লেখযোগ্য যে প্ৰত্যয় দাসৰ পত্নী শ্ৰেয়া পালৰ বহুকেইজন ব্যক্তিৰ সৈতে বিবাহ বহিৰ্ভূত সম্পৰ্ক আছিল আৰু সেয়া প্ৰায় ৰাজহুৱা আছিল। প্ৰত্যয় দাসে এই অন্যায়ৰ সুবিচাৰ বিচাৰি কৰিমগঞ্জ আৰক্ষী থানাত গোচৰো দিছিল, কিন্তু আৰক্ষী নিষ্ক্ৰিয় হৈ থকাৰ লগতে শ্ৰেয়াই ওলোটাই তেওঁক নিৰ্য্যাতন কৰা বুলি গোচৰ দিছিল। প্ৰণয় দাসে তেওঁৰ এফ আই আৰ খনত নাম দিয়া কেইজনৰ সৈতে তেওঁৰ পত্নীৰ অবৈধ সম্পৰ্কৰ কথা ছচিয়েল মিডিয়াতো উল্লেখ কৰি গৈছিল। জানিব পৰামতে আৰক্ষীয়ে পৱন কলিতাকে ধৰি আনকেইজন অভিযুক্তৰ সন্ধান কৰি আছে। অভিযুক্তকেইজনৰ তিনিজন আৰক্ষীৰ লোক বুলিও জনা গৈছে।
