সংসদৰ বৰ্ষাকালীন অধিৱেশনৰ পূৰ্বে মঙলবাৰে নতুন দিল্লীত অনুষ্ঠিত হোৱা সৰ্বদলীয় বৈঠকত অসম তথা উত্তৰ-পূবৰ জনজাতীয় লোকসকলৰ সমস্যা সমূহ সমাধানৰ বাবে প্ৰধান মন্ত্ৰী নৰেন্দ্ৰ মোদীৰ ওচৰত দাবী জনায় বিপিএফৰ সাংসদ বিশ্বজিৎ দৈমাৰীয়ে।
সাংসদ দৈমাৰীয়ে এই বিষয়ে জানিবলৈ দি কয় যে তেওঁ উত্থাপন কৰা দাবীসমূহ বিভিন্ন সময়ত ৰাজনৈতিক দল অথবা চৰকাৰে সমাধান কৰাৰ প্ৰতিশ্ৰুতি প্ৰদান কৰিছিল। কিন্তু আজি পৰ্যন্ত সেই সমস্যা সমূহৰ কোনো সমাধান নোলাল। সেয়ে মই প্ৰধান মন্ত্ৰীৰ ওচৰত ইয়াৰ সমাধান বিচাৰি দাবী সম্বলিত পত্ৰ প্ৰদান কৰিছো।
ইয়াৰ উপৰি অসমৰ খিলঞ্জীয়া লোকৰ সুৰক্ষাৰ স্বাৰ্থত অসম চুক্তিৰ ৬ নং দফা ৰূপায়ণ হোৱাটো অত্যন্ত প্ৰয়োজনীয়। সেয়ে এই বিষয়টোত প্ৰধান মন্ত্ৰীয়ে প্ৰত্যক্ষভাৱে হস্তক্ষেপ কৰাৰ কাৰণেও তেওঁ পত্ৰৰ জৰিয়তে দাবী জনায়।
আনহাতে সাসংদ দৈমাৰীয়ে তাৎপৰ্যমূলক মন্তব্য কৰি কয় যে প্ৰধান মন্ত্ৰী নৰেন্দ্ৰ মোদীৰ ওপৰত উত্তৰ-পূৰ্বাঞ্চলৰ লোকৰ সম্পূৰ্ণ আস্থা তথা বিশ্বাস আছে। সেয়ে উত্তৰ-পূবৰ জনজাতীয় লোকসকলৰ দীৰ্ঘদিনীয়া সমস্যাসমূহ সমাধান কৰাৰ ক্ষেত্ৰত অগ্ৰণি ভূমিকা পালন কৰিবলৈ পত্ৰযোগে অনুৰোধ কৰে।
