মুম্বাইৰ আন্ধেৰী স্প’ৰ্টছ ক’মপ্লেক্সত চলি থকা হিৰ’ ইণ্টাৰনেশ্যনেল কাপত জিলিকি উঠিছে উত্তৰ-পূবৰ দুই তাৰকা ফুটবলাৰ ক্ৰমে জেজে আৰু হলিচৰণ নাৰ্জাৰী। দুয়োগৰাকী খেলুৱৈয়ে ভাৰতীয় দলৰ বিজয়ত লৈছে মুখ্য ভূমিকা।
প্ৰতিযোগিতাৰ প্ৰথমখন মেচত চীনা টাইপেৰ বিপক্ষে ৫-০ ৰ বৃহৎ ব্যৱধানত জয়ী হয় ভাৰত। মেচখনত হেটট্ৰিক অৰ্জন কৰা অধিনায়ক সুনীল চেত্ৰীয়ে সকলোৰে দৃষ্টি আকৰ্ষণ কৰিলেও মেচখনত মিজোৰামৰ খেলুৱৈ তথা ভাৰতীয় দলৰ ফৰৱাৰ্ড জেজেয়ে গুৰুত্বপূৰ্ণ ভূমিকা পালন কৰে। মেচখনত অধিকাংশ সময় বল নিজৰ দখলত ৰাখি নিস্বাৰ্থভাৱে প্লে মেকাৰৰ ভূমিকা পালন কৰা দেখা যায় জেজেক।
আনহাতে সোমবাৰে নিশা অনুষ্ঠিত হৈ যোৱা দ্বিতীয়খন খেলত ভাৰতৰ প্ৰতিদ্বণ্ডী আছিল আফ্ৰিকা মহাদেশৰ কেনিয়া। খেলখনত ৩-০ ৰ ব্যৱধানত জয়ী হয় ভাৰত।
মূষলধাৰ বৰষুণে অসুবিধাৰ সৃষ্টি কৰা মেচখনৰ প্ৰথমাৰ্ধত বল নিয়ন্ত্ৰণ কৰাত বিফল হৈছিল দুয়োটা দলে। আৰু এইদৰে গ’ল শূণ্যভাৱে অন্ত পৰে প্ৰথমাৰ্ধৰ খেল।
দ্বিতীয়াৰ্ধত দুয়োটা দলৰে খেলুৱৈয়ে নিজৰ নিজৰ চন্দ ঘূৰাই পোৱা দেখা গ’ল। দুয়োটা দলে দেখুৱালে নিজৰ কলাত্মক কৌশল। কিন্তু মেচখনত সফলতা আহিল ভাৰতীয় দললৈ। ভাৰতীয় দলৰ অধিনায়ক সুনীল চেত্ৰীক বিপক্ষৰ খেলুৱৈয়ে পেনাল্টী বক্সত কৰা আক্ৰমণৰ ফলস্বৰূপে ভাৰতে লাভ কৰিলে পেনাল্টী। আৰু এইদৰে ১-০ৰ অগ্ৰগতি লাভ কৰে ভাৰতে।
সুনীল চেত্ৰীয়ে গ’ল কৰাৰ ঠিক তিনি মিনিট পাছতে ভাৰতে দ্বিতীয়টো অগ্ৰগতি লাভ কৰিলে আক্ৰমক ফৰৱাৰ্ড জেজেৰ জৰিয়তে। ভাৰতীয় দলৰ অভিজ্ঞ মিডফিল্ডাৰ তথা অসম সন্তান হলিচৰণ নাৰ্জাৰীয়ে আগবঢ়োৱা বল জেজেয়ে সুন্দৰভাৱে আয়ত্ত কৰি কলাত্মক কৌশলেৰে এক আকৰ্ষণীয় গ’ল প্ৰদান কৰে। আৰু ভাৰতে ২-০ৰ অগ্ৰগতি লাভ কৰিবলৈ সক্ষম হয়।
আনহাতে এই খেলখনৰে ৯০ মিনিট পাৰ হৈ যোৱাৰ পাছত অৰ্থাৎ মেচৰ অতিৰিক্ত সময়ত অধিনায়ক চেত্ৰীয়ে আন এক গ’ল কৰি ব্যৱধান ৩-০ লৈ বৃদ্ধি কৰি এইদৰে কেনিয়াৰ বিৰুদ্ধে সহজ বিজয় সাব্যস্ত কৰে।
উল্লেখ্য যে শততম আন্তঃৰাষ্ট্ৰীয় মেচ খেলা সুনীল চেত্ৰীয়ে গঢ়িলে আন এক অভিলেখ। আন্তঃৰাষ্ট্ৰীয় খেলৰ পৰা অৱসৰ নোলোৱা সৰ্বাধিক গ’ল প্ৰদান কৰা খেলুৱৈৰ ভিতৰত তিনি নম্বৰ স্থানত আছে ভাৰতীয় তাৰকা সুনীল চেত্ৰী। সৰ্বাধিক গ’ল দাতাৰ শাৰীত চেত্ৰীৰ ওপৰত আছে বিশ্ব ফুটবলৰ দুই আলোড়ণ সৃষ্টিকাৰী ফুটবলাৰ ক্ৰমে প্ৰথম স্থানত ৰ’নাল্ডো আৰু দ্বিতীয় স্থানত মেছী।
