ম্যানমাৰ চৰকাৰে ৰহিঙীয়া সংকটৰ সময়ত বাংলাদেশলৈ পলাই যোৱা ৪০০ হিন্দু পৰিয়ালক ঘূৰাই অনাৰ পদক্ষেপ ল’ব। দেশখনৰ সমাজ কল্যাণ আৰু সাহায্য তথা পুনৰ সংস্থাপন মন্ত্ৰী ড০ ৱিন ম্যাত আয়েই যোৱা বৃহস্পতিবাৰে সংবাদিকৰ আগত এই কথা ব্যক্ত কৰে। উক্ত দিনা প্ৰশাসনিক ৰাজধানী নেইপেইতাওত হোৱা য়ুনিয়ন এণ্টাৰপ্ৰাইজ ফৰ হিউমেনিটেৰিয়ান এছিছটেন্স, ৰিছেটলমেণ্ট এণ্ড ডেৱেলমেণ্ট ইন ৰেখাইন ডিষ্ট্ৰিকতৰ (Union Enterprise for Humanitarian Assistance, Resettlement and Development in Rakhine State (UEHRD)) এখন সভাত মন্ত্ৰীগৰাকীয়ে এই স্থিতি ব্যক্ত কৰে। ইতিপূৰ্বে ম্যামমাৰ চৰকাৰে দেশত্যাগী হিন্দু লোকসকলৰ বাবে তেওঁলোক ঘূৰি আহিবৰ বাবে পূৰাব লগীয়া আৱেদন প্ৰ-পত্ৰ প্ৰেৰণ কৰিছে বুলিও জনায়। ‘আমি থকা ঘৰৰ সংখ্যা চাই লৈ আৰু অধিক আৱেদন প্ৰ-পত্ৰ প্ৰেৰণ কৰিম।‘ এইদৰে কয় মন্ত্ৰীজনে। উল্লেখযোগ্য যে যোৱা ২২ নৱেম্বৰত ম্যানমাৰ আৰু বাংলাদেশ চৰকাৰে ভগনীয়াসকলৰ পুনৰ সংস্থাপন বিষয়ত এক বুজাবুজিৰ চুক্তিত উপনীত হৈছিল। পৰৱৰ্তী তিনি সপ্তাহৰ ভিতৰত এখন যুটীয়া কমিটি গঠন কৰিবলৈ আৰু দুমাহৰ ভিতৰত পুনৰসংস্থাপন প্ৰক্ৰিয়াটো আৰম্ভ কৰিবলৈ দুয়োখন দেশ সন্মত হৈছিল। মন্ত্ৰীজনে জনোৱা মতে, ম্যামমাৰ চৰকাৰে হিন্দু শৰণাৰ্থীসকলৰ অনুৰোধত আৱেদন পত্ৰ প্ৰেৰণ কৰিছে। মন্ত্ৰীজনে তাৎপৰ্য্যপূৰ্ণ মন্তব্য কৰে যে যিসকল ম্যানমাৰলৈ স্বেচ্ছাই ঘূৰি অহাৰ প্ৰতি আগ্ৰহী তেওঁলোকলৈহে আৱেদন পত্ৰ প্ৰেৰণ কৰিব আৰু তেওঁলোককহে গ্ৰহণ কৰিব। ‘আমি তেওঁলোকৰ বাবে থকা-মেলাৰ ব্যৱস্থা কৰি আছো। উদাহৰণস্বৰূপে আমি নাগা খু য়া আৰু টৌং পিয়ো লেট ৱেই গাঁৱত ঘৰ বনোৱাৰ পৰিকল্পনা কৰিছো, য’ত ঘৰবোৰ জ্বলাই দিয়া হৈছিল।
আনহাতে ৰেখাইন প্ৰদেশৰ বুথিদৌং সমষ্টিক প্ৰতিনিধিত্ব কৰা আৰাকানী বিধায়ক য়ু আং থৌং শ্বিৱে চৰকাৰক পুনৰ সংস্থাপন চুক্তিখন ৰাজহুৱা নকৰা বাবে সমালোচনা কৰে। তেওঁ কয় যে যদিহে বাংলাদেশীসকলক ঘূৰাই অনা হয়, তেন্তে আৰাকানীসকলে তেওঁলোকৰ নিজৰ চহৰ এৰি যাবগৈ। কাৰণ এই শৰণাৰ্থীসকলৰ লগতে বিদ্ৰোহী সংগঠনৰ লোকো প্ৰৱেশ কৰাৰ সম্ভাৱনা আছে।
কোৱা উচিত হ’ব যে ৰাষ্ট্ৰসংঘৰ হিচাপ মতে যোৱা ২৫ আগষ্টৰ পৰা ৬ লাখতকৈও অধিক সংখ্যক ৰহিঙীয়া বাংলাদেশলৈ পলাই গৈছিল, যিটো পৰিসংখ্যা ম্যানমাৰ চৰকাৰে অস্বীকাৰ কৰি আহিছে।
