নতুন ৰূপ পাব অসম তথা গুৱাহাটীৰ অন্যতম সাংস্কৃতিক মঞ্চ ৰবীন্দ্ৰ ভৱনে। উচ্চ মানৰ নাট্যানুষ্ঠান, সংগীতানুষ্ঠান, চিনেমা আদি পৰিৱেশন-প্ৰদৰ্শন কৰা দল-অনুষ্ঠানৰ বাবে এটা নিৰ্ভৰযোগ্য কেন্দ্ৰ হিচাপে পৰিচিত তথা গুৱাহাটীৰ কলা-ৰসিকসকলৰ বাবে ভিন্নধৰ্মী কলাৰ ৰসাস্বাদনৰ অন্যতম উৎস -এই ৰবীন্দ্ৰ ভৱন মেৰামতি আৰু উন্নীতকৰণৰ স্বাৰ্থত ছমাহৰ পৰা এবছৰ পৰ্য্যন্ত বন্ধ থাকিব পাৰে। এই কথা জানিবলৈ দিছে অসম চৰকাৰৰ সাংস্কৃতিক সঞ্চালকালয়ৰ এটা সূত্ৰই।
সূত্ৰটোৰ মতে ইতিমধ্যে ৰাজ্য চৰকাৰৰ সাংস্কৃতিক সঞ্চালকালয়ে এই সাংস্কৃতিক ভৱনটোৰ উন্নয়ন তথা মেৰামতিৰ কাম আৰম্ভ কৰিছে।
সূত্ৰটোৱে কয় যে, যোৱা বছৰৰ অক্টোবৰতে ভৱনটোৰ উন্নয়ন তথা মেৰামতি কৰাৰ সময় নিৰ্ধাৰণ কৰা হৈছিল যদিও যোৱা ১৫-২০ দিনৰ পৰাহে ভৱনটোৰ উন্নয়ন আৰু মেৰামতিৰ কাম আৰম্ভ কৰিছে। ভৱনটোৰ উন্নয়ন আৰু মেৰামতিৰ কাম আৰম্ভ কৰাৰ ফলত ৰবীন্দ্ৰ ভৱনত অনুষ্ঠান পৰিৱেশন আৰু সভা-সমিতিৰ বাবে অনুমোদন সাময়িকভাৱে স্থগিত ৰখা হৈছে।
এই সন্দৰ্ভত সাংস্কৃতিক সঞ্চালকালয়ৰ সঞ্চালিকা বৰ্ণালী শৰ্মাই কয় যে ৰবীন্দ্ৰ ভৱনৰ উন্নয়ন আৰু মেৰামতিৰ বাবে ৫ কোটি টকা নিৰ্ধাৰণ কৰা হৈছে। তেওঁ জনায় যে ভৱনটোৰ উন্নয়ন আৰু মেৰামতিৰ কামৰ বিভিন্ন পৰ্যালোচনা কৰাৰ বাবে অহা ৩ এপ্ৰিলত এখন সভা আহ্বান কৰা হৈছে। সভাত ভৱনটোৰ উন্নয়ন আৰু মেৰামতিৰ বিভিন্ন দিশ সম্পৰ্কত বিস্তৃত আলোচনা কৰা হ’ব বুলি তেওঁ জনায়। ভৱনটোৰ উন্নয়ন আৰু মেৰামতি কৰাৰ সন্দৰ্ভত সঞ্চালকালয়ৰ এক সূত্ৰই জনায় যে ভৱনটোত থকা প্ৰস্ৰাৱাগাৰ আৰু শৌচাগাৰবোৰ মেৰামতি কৰাৰ লগতে নতুন প্ৰস্ৰাৱাগাৰ আৰু শৌচাগাৰ নিৰ্মাণ কৰা হ’ব। লগতে ভৱনৰ ভিতৰত থকা চকীবোৰৰ মেৰামতি কৰাৰ লগতে ব্যৱহাৰৰ অনুপযোগী হৈ পৰা চকীবোৰ আঁতৰাই নতুন চকীৰ ব্যৱস্থা কৰা হ’ব। ভৱনত বিজুলী বাতিবোৰ ঠিক কৰাৰ লগতে অত্যাধুনিক বিজুলী বাতি সংযোগ কৰা হ’ব। মঞ্চৰ লাইটবোৰ অত্যাধুনিক কৰা হ’ব।
মঞ্চখন আৰু চিলিঙৰো সম্পূৰ্ণ অত্যাধুনিক ৰূপ দিয়া হ’ব। সূত্ৰটোৱে জনায় যে ভৱনটোৰ বেৰবোৰ আৰু মঞ্চ মেৰামতি কৰা কামটো প্ৰত্যাহ্বানমূলক হ’ব। কাৰণ ভৱনটোৰ বেৰবোৰত বৰষুণৰ পানী পৰি বহু অংশ বেয়া হৈ গৈছে। এইবোৰ মেৰামতি কৰাৰ বাবে সময়ৰ প্ৰয়োজন হ’ব। আকৌ ভৱনটোৰ মঞ্চখন পথৰ সমান হোৱা বাবে বাৰিষাৰ সময়ত ৰাস্তাত হোৱা বানপানীৰ ফলত মঞ্চখনৰ তলৰ অংশ বেয়া হৈছে। এই বেয়া অংশবোৰ মেৰামতি কৰাৰ ক্ষেত্ৰতো সময়ৰ প্ৰয়োজন হ’ব বুলি সূত্ৰটোৱে জনায়। সূত্ৰটোৱে প্ৰকাশ কৰা মতে, এই কামবোৰ সম্পূৰ্ণ কৰাৰ বাবে এবছৰ সময়ৰ প্ৰয়োজন হ’ব। ইপিনে, সাংস্কৃতিক সঞ্চালকালয়ৰ সঞ্চালিকাগৰাকীয়ে কয় যে ছমাহৰ ভিতৰত কাম সম্পূৰ্ণ কৰাৰ চেষ্টা কৰা হ’ব। তেওঁ কয় যে গোটেই কাৰিকৰী কামখিনি গড়কাপ্টানি বিভাগে চোৱাচিতা কৰি আছে। উল্লেখ্য যে আন্তঃৰাষ্ট্ৰীয় তথা ৰাষ্ট্ৰীয় পৰ্যায়ৰ নাটক, চলচ্চিত্ৰ প্ৰদৰ্শন, গীত, নাট্য তথা অন্যান্য সভা আদি অনুষ্ঠিত কৰি অহা ৰবীন্দ্ৰ ভৱনত ভৱনৰ মেৰামতি তথা উন্নয়নৰ কাম চলি থকাৰ বাবে শিল্পী তথা অনুষ্ঠানসমূহ সমস্যাত পৰিছে।
