ৰক্ষকেই ভক্ষকত পৰিণত হোৱা এগৰাকী মহিলা আৰক্ষী উপ-পৰিদৰ্শকক আজি ক্ষেত্ৰীৰ আৰক্ষী থানাৰ ভাৰপ্ৰাপ্ত বিষয়া পি কে নাথৰ নেতৃত্বৰ এটা অভিযানকাৰী দলে নুনমাটি থানাৰ সহযোগত প্ৰৱঞ্চনাৰ অভিযোগত গ্ৰেপ্তাৰ কৰিছে। নাৰেংগীৰ শান্তিনগৰৰ তেওঁৰ ঘৰৰ পৰা দিনৰ প্ৰায় ১ বজাত গ্ৰেপ্তাৰ কৰা এই আৰক্ষী উপ-পৰিদৰ্শকগৰাকী হ’ল দিচপুৰ থানাৰ প্ৰেমলতা শইকীয়া।
ক্ষেত্ৰী আৰক্ষীয়ে জনোৱামতে, ৪৯ বছৰীয়া মহিলা আৰক্ষী বিষয়াগৰাকীক মাটি-বাৰী সম্পৰ্কীয় এটা প্ৰৱঞ্চনাৰ গোচৰত গ্ৰেপ্তাৰ কৰা হৈছে।
আৰক্ষীৰ সূত্ৰটোৱে জনোৱা মতে, শইকীয়াই ছয়মাইলৰ হেমলতা ভাটী নামৰ এগৰাকী মহিলাৰ পৰা তেওঁৰ নামত ক্ষেত্ৰীত থকা এডোখৰ মাটি বিক্ৰী কৰি দিম বুলি লৈছিল। কিন্তু তাৰ পিছৰ পৰাই তেওঁ পলাতক হৈ থাকে।
“ক্ষেত্ৰীৰ ৩.৫ কঠা পৰিমাণৰ মাটিডোখৰ বিক্ৰী কৰি দিম বুলি বৃহৎ পৰিমাণৰ টকা লোৱাৰ পিছৰ পৰাই তেওঁ পলাতক হৈ আছিল।” আৰক্ষী আয়ুক্ত হীৰেন নাথে এইদৰে কয়।
তেওঁ লগতে কয় যে অভিযুক্ত মহিলা আৰক্ষী বিষয়াগৰাকীক ছমাহ পূৰ্বে নলবাৰীলৈ বদলি কৰা হৈছিল যদিও তেওঁ যোগদান কৰা নাছিল।
তেওঁ আন কেইবাটাও প্ৰৱঞ্চনাৰ ঘটনাত জড়িত বুলি আৰক্ষী আয়ুক্ত হীৰেন নাথে নৰ্থ-ইষ্ট নাওক জানিবলৈ দিয়ে।
ক্ষেত্ৰী থানাই জনোৱামতে, এই মাটি-বাৰীৰ প্ৰৱঞ্চনাৰ গোচৰটো সন্দৰ্ভত মহিলা আৰক্ষী বিষয়াগৰাকীৰ বিৰুদ্ধে ক্ষেত্ৰী থানাত 27/16 নম্বৰৰ গোচৰ ৰুজু কৰা হৈছিল।
জানিব পৰা মতে, অভিযুক্ত আৰক্ষী উপ-পৰিদৰ্শকগৰাকীক কাইলৈ কামৰূপ মহানগৰ জিলা ছেছন আদালতত হাজিৰ কৰোৱা হ’ব।
