অখিল গগৈৰ ১২ মাহৰ কাৰাবাস নিশ্চিত

ৰাষ্ট্রীয় নিৰাপত্তা আইনৰ অধীনত গ্রেপ্তাৰ হৈ ডিব্ৰুগড়ৰ কেন্দ্রীয় কাৰাগাৰত দিন কটোৱা কৃষক নেতা অখিল গগৈক মুক্তি দিবৰ বাবে কৃষক মুক্তিয়ে জনোৱা আৱেদনত অসম চৰকাৰৰ দ্বাৰা নিযুক্ত ৰাষ্ট্রীয় নিৰাপত্তা আইনৰ উপদেষ্টা পৰিষদে সন্মতি নিদিলে। ফলত কৃষক নেতাজন ১২ মাহৰ বাবে কাৰাগাৰৰ ভিতৰতে থকাটো নিশ্চিত হৈ পৰিল। উপদেষ্টা পৰিষদে দিয়া প্ৰতিবেদনৰ ভিত্তিত কালি ৰাজ্যপাল জগদীশ মুখিয়ে এই পদক্ষেপত অনুমোদন জনায় আৰু গৃহ বিভাগে এই সন্দৰ্ভত জাননী জাৰি কৰে। যোৱা অক্টোবৰ মাহত গুৱাহাটী উচ্চ ন্যায়ালয়ৰ প্ৰাক্তন বিচাৰপতি পি জি আগৰৱালৰ নেতৃত্বত অসম চৰকাৰৰ দ্বাৰা গঠিত উপদেষ্টা পৰিষদে এই সন্দৰ্ভত অখিল গগৈ, আৰক্ষী আৰু আন কিছুমান পক্ষৰ শুনানি লৈছিল। উল্লেখযোগ্য যে ৰাষ্ট্ৰীয় নিৰাপত্তা আইনৰ অধীনত বন্দী হৈ থকা সময়ছোৱাত কৃষক নেতাজনে জামিনৰ আৱেদন কৰিব নোৱাৰিব। আনহাতে অহা ২০ আৰু ২১ নৱেম্বৰত দিল্লীত দেশৰ প্ৰায় ১৫০ টা কৃষক সংগঠনে All India Kishan Sangharsh Coordination Committeeৰ তত্ত্ৱধানত অখিল গগৈৰ মুক্তিৰ দাবীত ধৰ্ণা কাৰ্য্যসূচী ৰূপায়ণ কৰাৰ কথা। ইয়াত ভাগ ল’বলৈ কৃষক মুক্তি সংগ্ৰাম সমিতিৰ প্ৰায় ২০০ সদস্য ইতিপূৰ্বে ৰাওনা হোৱা বুলি জানিব পৰা গৈছে।