অধ্যাপক হৰদেও সিং য়াদৱক অৰুণাচল প্ৰদেশৰ নিৰজুলিত থকা নেৰিস্ত (North Eastern Regional Institute of Science and Technology)ৰ সঞ্চালক হিচাপে আজি মঙলবাৰে নিযুক্তি দিয়া হৈছে।
২০১৪ চনৰ পৰা সঞ্চালকহীনভাৱে চলি থকা নেৰিস্তৰ ছাত্ৰ-ছাত্ৰীসকলৰ ব্যাপক প্ৰতিবাদৰ পিছত ভাৰত চৰকাৰৰ মানৱ সম্পদ উন্নয়ন বিভাগৰ উচ্চ শিক্ষা বিভাগে আজি এই কথা ঘোষণা কৰিছে।
নেৰিস্তৰে ৰসায়ন বিভাগৰ অধ্যাপক হিচাপে কৰ্মৰত ডঃ য়াদৱে ২০১৬ চনৰ ১৯ এপ্ৰিলৰ পৰা যোৱা বছৰৰ ২৬ মাৰ্চলৈকে প্ৰতিষ্ঠানটোৰ ভাৰপ্ৰাপ্ত সঞ্চালকৰূপে কাৰ্য্যনিৰ্বাহ কৰিছিল।
১৯৮৬ চনত উত্তৰ প্ৰদেশৰ গোৰখপুৰ বিশ্ববিদ্যালয়ৰ পৰা পি এইচ ডি লাভ কৰা ডঃ য়াদৱে ১৯৮৭ চনৰ ১ জুলাইত নেৰিস্তত সহকাৰী অধ্যাপক হিচাপে যোগ দিছিল।
১৯৮৪ চনত ইটানগৰৰ ওচৰৰ নিৰ্জুলিত স্থাপিত বিজ্ঞান আৰু প্ৰযুক্তি শিক্ষানুষ্ঠান নেৰিস্ত ভাৰত চৰকাৰৰ মানৱ সম্পদ উন্নয়ন বিভাগৰ পুঁজি আৰু নিয়ন্ত্ৰণত পৰিচালিত হয়।
প্ৰতিষ্ঠানটোৰ সৰ্বোচ্চ পৰিচালনা সমিতি নেৰিস্ত চচাইটিৰ মুৰব্বী হিচাপে অৰুণাচল প্ৰদেশৰ ৰাজ্যপাল গৰাকী থকাৰ লগতে উত্তৰ-পূৰ্বাঞ্চলৰ ৰাজ্যসমূহৰ শিক্ষা মন্ত্ৰীসকল ইয়াৰ সদস্য হিচাপে থাকে।
