অনিল ৰাজাক কংগ্ৰেছ দলৰ পৰা নিলম্বন কৰা হৈছে।
দলে ৰাজালৈ জাৰি কৰা কাৰণ দৰ্শোৱা জাননীৰ উত্তৰ নিদিয়াৰ বাবেই তেওঁক আজি দলৰ পৰা বহিষ্কাৰ কৰাৰ সিদ্ধান্ত লোৱা হয় বুলি জানিব পৰা গৈছে।
উল্লেখযোগ্য যে অসম প্ৰদেশ কংগ্ৰেছ সমিতিৰ প্ৰাক্তন সাধাৰণ সম্পাদক ৰাজাই প্ৰাক্তন মন্ত্ৰী তথা দলটোৰ এজন প্ৰভাৱশালী নেতা ৰকিবুল হুছেইনৰ বিৰুদ্ধে মন্ত্ৰী হৈ থাকোতে ব্যাপক দুৰ্নীতি কৰি বিশাল সম্পত্তি আহৰণ কৰা বুলি অভিযোগ আনি হুছেইনৰ ‘সম্পত্তিৰ তালিকা’ সংবাদ মাধ্যমলৈ প্ৰেৰণ কৰিছিল। ৰকিবুলৰ নিজৰ আৰু পৰিয়ালৰ আন সদস্যৰ নামত ৰাজ্যৰ বিভিন্ন ঠাইত আৰু ৰাজ্যৰ বাহিৰতো মাটি, ফ্লেট, ব্যৱসায়িক প্ৰতিষ্ঠান আদি থকা বুলি দাবী কৰিছিল ৰাজাই।
দেওবাৰে কংগ্ৰেছৰ ৰাষ্ট্ৰীয় নেতা গুলাম নবী আজাদে ৰাজীৱ ভৱনত সংবাদ মেল সম্বোধন কৰাৰ সময়ত তালৈ অহা ৰাজা দলীয় কৰ্মীৰ ব্যাপক প্ৰতিবাদৰ সম্মুখীন হ’ব লগা হৈছিল।
বহুসংখ্যক দলীয় কৰ্মীয়ে ৰাজাক ‘বিজেপিৰ এজেণ্ট’, ‘ঘৰ বিভীষণ’ আদি বুলি তিৰস্কাৰ কৰিছিল।
