অনুসূচিত জাতি-জনজাতিৰ লোকক উপযুক্ত নিৰাপত্তা দিয়াৰ দাবীত কাইলৈ সমগ্ৰ ৰাজ্যজুৰি কংগ্ৰেছৰ ৮ ঘণ্টীয়া অনশন কাৰ্য্যসূচী

দেশৰ ভিন্ন প্ৰান্তত অনুসূচিত জাতি-জনজাতি লোকসকলৰ ওপৰত কিছু সংখ্যক লোকে অত্যাচাৰ চলোৱাৰ অভিযোগ তোলাৰ লগতে সমগ্ৰ দেশতে মোদী চৰকাৰে সাম্প্ৰদায়িক সংঘৰ্ষৰ সূত্ৰপাত কৰাৰ অভিযোগ তুলি অসম প্ৰদেশ কংগ্ৰেছ কমিটিয়ে ৰাজ্যৰ প্ৰত্যেক জিলাৰ সদৰত ৮ ঘণ্টীয়া অন্নশন কাৰ্য্যসূচী ৰূপায়ণ কৰিব।

দলটোৰ সূত্ৰই কয় যে মোদী নেতৃত্বাধীন বিজেপি চৰকাৰে অনুসূচিত জাতি-জনজাতিৰ সুৰক্ষা আইনখন উচ্চতম ন্যায়ালয়ত সঠিকভাৱে ৰক্ষণাবেক্ষণ দিব নোৱাৰিলে। যাৰ ফলস্বৰূপে যোৱা ২ এপ্ৰিলত দেশজুৰি পালন কৰা ভাৰত বন্ধ কাৰ্য্যসূচীত কেইবাখনো বিজেপি শাসিত ৰাজ্যত আৰক্ষী আৰু নিৰাপত্তাৰক্ষীৰ গুলীত ৯ গৰাকীৰো অধিক প্ৰতিবাদকাৰীয়ে মৃত্যুক সাৱটি লৈছিল।

ইয়াৰ প্ৰতিবাদতে অসম প্ৰদেশ কংগ্ৰেছ কমিটীয়ে ৯ এপ্ৰিলত ৰাজ্যৰ জিলা সদৰসমূহত ৮ ঘণ্টীয়া অনশন কাৰ্য্যসূচী ৰূপায়ণ কৰিব বুলি কংগ্ৰেছৰ মুখপাত্ৰ ঋতুপৰ্ণ কোঁৱৰে নৰ্থ-ইষ্ট নাওক অৱগত কৰিছে।

তদুপৰি মহানগৰীৰ দিচপুৰ প্ৰেছ ক্লাবৰ সন্মুখৰ পথাৰখনত এই অনশন কাৰ্য্যসূচী অনুষ্ঠিত হ’ব বুলিও মুখপাত্ৰগৰাকীয়ে আমাক জানিবলৈ দিয়ে। তেওঁ জানিবলৈ দিয়ামতে এই অনশন কাৰ্য্যসূচী পুৱা ৮ বজাৰ পৰা বিয়লি ৪ বজালৈকে চলিব।

উল্লেখযোগ্য যে ১৯৮৯ চনতে  অনুসূচিত জাতি-জনজাতি সকলৰ সুৰক্ষাৰ বাবে বলৱৎ হোৱা Scheduled Castes and the Scheduled Tribes (Prevention of Atrocities) Act, 1989 আইনখনৰ যোৱা ২০ মাৰ্চত উচ্চতম ন্যায়ালয়ে দফা দুটাৰ সংশোধন ঘটাই শিথিল কৰে।

নতুন নিয়ম মতে অনুসূচিত জাতি-জনজাতিৰ কৰ্মচাৰীক অত্যাচাৰ চলোৱা অভিযুক্তক গ্ৰেপ্তাৰ কৰিবলৈ হ’লে নিয়োগ কৰা নিয়োগকৰ্তাৰ পৰা অনুমতি লোৱাৰ ব্যৱস্থা কৰিছে। লগতে দ্বিতীয় দফাটোত সৰ্বসাধাৰণ অনুসূচিত জাতি-জনজাতি লোকক অত্যাচাৰ চলোৱা অভিযুক্তক গ্ৰেপ্তাৰ কৰিবলৈ থানাৰ আৰক্ষী বিষয়াই কোনো ব্যৱস্থা গ্ৰহণ কৰিব নোৱাৰিব, এই ক্ষেত্ৰত জিলা আৰক্ষী অধীক্ষক অথবা অতিৰিক্ত আৰক্ষী অধীক্ষকেহে তদন্ত কৰিহে গ্ৰেপ্তাৰ কৰাৰ সিদ্ধান্ত ল’ব পাৰিব। কংগ্ৰেছ দলৰ মতে, এই ব্যৱস্থাত মূল অভিযুক্ত সাৰি যোৱাৰ সম্ভাৱনা বেছি।