অবৈধ আধাৰ কাৰ্ড প্ৰদান কৰা প্ৰৱঞ্চকক গ্ৰেপ্তাৰ

আধাৰ কাৰ্ডৰ কামৰ জালিয়াতিৰ বাবে আজি হাতীগাঁও থানাৰ আৰক্ষীয়ে গ্ৰেপ্তাৰ কৰে বিজু ৰঞ্জন বৰুৱা নামৰ ব্যক্তিজনক। আৰক্ষীয়ে দিল্লীস্থিত আধাৰ কাৰ্ডৰ মুখ্য কাৰ্যালয়ৰ পৰা গোচৰ পোৱাৰ পিছতেই নিজ  গৃহৰ পৰা আটক কৰে বিজু বৰুৱা নামৰ প্ৰৱঞ্চকজনক। উল্লেখযোগ্য যে ব্যক্তিজন UID আধাৰ কাৰ্ডৰ অফিচৰ ইনচাৰ্জ হিচাপে কৰ্মৰত আছিল। প্ৰৱঞ্চকজনে ১০৪৯জন ব্যক্তিৰ পৰা অবৈধভাৱে টকা লৈ তেওঁলোকক আধাৰ কাৰ্ড প্ৰদান কৰিছিল। আৰক্ষীয়ে অভিযান চলাই বিজু বৰুৱাক নুনমাটিস্থিত বাসগৃহৰ পৰা আটক কৰাৰ লগতে কিছুমান আপত্তিজনক নথি-পত্ৰ উদ্ধাৰ কৰে আৰু এটা লেপটপো জব্দ কৰে। উল্লেখযোগ্য যে ভাৰতবৰ্ষৰ অন্য ৰাজ্যত আধাৰ কাৰ্ডৰ কাম চলি আছে যদিও অসমত এতিয়াও আধাৰ কাৰ্ডৰ কাম চলাবলৈ চৰকাৰীভাৱে কোনো ধৰণৰ নিদেৰ্শনা দিয়া হোৱা নাই বা আধাৰ কাৰ্ডে বৈধতা লাভ কৰা নাই । এনে ক্ষেত্ৰত আধাৰ কাৰ্ড বনোৱা দুষ্টচক্ৰৰ সক্ৰিয়তাই প্ৰশাসনৰ স্বচ্ছতাৰ প্ৰতি সন্দেহৰ সৃষ্টি কৰিছে।