অম্বুবাচী মেলাৰ সকলো প্ৰস্তুতি ১৮ জুনৰ ভিতৰত সম্পন্ন কৰাৰ নিৰ্দেশ উপায়ুক্ত মিট্টালৰ
কামাখ্যা ধামৰ আগন্তুক অম্বুবাচী মেলা যাতে সুকলমে অনুষ্ঠিত হয় তাৰ বাবে কামৰূপ জিলা প্ৰশাসনে বিভিন্ন ব্যৱস্থা গ্ৰহণ কৰিছে। ফলত অম্বুবাচী মেলাৰ বাবে বিভিন্ন দিশত চলি থকা প্ৰস্তুতিসমূহ ১৮ জুনৰ ভিতৰত সম্পূৰ্ণ কৰিবলৈ উপায়ুক্ত বিৰেন্দ্ৰ মিট্টালে বিষয়া সকলক নিৰ্দেশ দিছে।
উল্লেখযোগ্য যে সোমবাৰে উপায়ুক্ত মিট্টালৰ সভাপতিত্বত গুৱাহাটী আৱৰ্ত ভৱনত কামাখ্যা বৰদেউৰী সমাজৰ প্ৰতিনিধিৰ লগতে বিভিন্ন বিভাগৰ বিষয়াৰ উপস্থিতিত এখন বৈঠক অনুষ্ঠিত হয়। বৈঠকতে উপায়ুক্ত মিট্টালে বাট-পথ নিৰ্মাণ, যাত্ৰীৰ বাবে শিবিৰ, অস্থায়ী শৌচালয়, বিজুলী-বাতিৰ ব্যৱস্থা, পৰিষ্কাৰ-পৰিচ্ছন্নতা, খাদ্য-পানী যোগান, চিকিৎসা সেৱা কেন্দ্ৰ, যাতায়াতৰ ব্যৱস্থা আদি বিষয়ত চলি থকা কামৰ অগ্ৰগতিৰ বুজ লয়।
এই বৈঠকত উত্তৰ-পূব সীমান্ত ৰে’লৰ বিষয়াসকলক ৰে’লৰ ফালৰ পৰা ৰে’লৱে ষ্টেইশ্যন, অ’ভাৰব্ৰীজ আদিত বিশেষ ধৰণেৰে বৈদ্যুতিকীকৰণ গ্ৰহণ কৰিবলৈ নিৰ্দেশ দিয়ে।
আনহাতে অম্বুবাচী মেলাৰ যাত্ৰী সকলৰ জোতা-ছেণ্ডেল ৰখাৰ বাবে নামনিৰ পৰা চাৰিটা স্থানৰ ব্যৱস্থা কৰা হৈছে। সভাত মহানগৰ আৰক্ষী আয়ুক্ত হীৰেন চন্দ্ৰ নাথে ভূতনাথ আদি অঞ্চলত ৰাজপথতে যাতে কোনোৱে খাদ্য বিতৰণ কৰিব নোৱাৰে তাৰ বাবে ব্যৱস্থা কৰিব বুলিও কয়।
বৈঠকতে উপায়ুক্ত গৰাকীয়ে সকলো বিষয়াকে সকলো কাম-কাজ ১৮ জুনৰ ভিতৰত সকলো কাম-কাজ সম্পন্ন কৰিবলৈ নিৰ্দেশ দিয়ে।