অসমত চলি থকা এন আৰ চি উন্নীতকৰণ প্ৰক্ৰিয়াই চুবুৰীয়া ৰাজ্যকেইখনত আৰ্থ-সামাজিক-ৰাজনৈতিক তথা আইন-শৃংখলাজনিত প্ৰভাৱ পেলোৱাৰ সম্ভাৱনাই দেখা দিছে। এই সম্ভাৱনা দেখা গৈছে অসমত এন আৰ চি উন্নীতকৰণ প্ৰক্ৰিয়াই অবৈধ বিদেশীসকলক চিনাক্ত কৰাটো সহজ কৰি তোলাৰ পৰিপ্ৰেক্ষিতত। বিদেশী বুলি চিনাক্ত হোৱা বা ধৰা পৰাৰ ভয়ত এতিয়া অসমৰ পৰা ইয়াৰ চুবুৰীয়া ৰাজ্যকেইখনলৈ অবৈধ নাগৰিকসকলৰ প্ৰব্ৰজন হোৱাৰ সম্ভাৱনাই দেখা দিছে। এনে হ’লে এইবোৰ ৰাজ্যত আইন-শৃংখলাজনিত প্ৰভাৱ পৰাৰ লগতে ইয়াৰ আৰ্থ-সামাজিক আৰু ৰাজনৈতিক দিশতো প্ৰভাৱ পেলাব পাৰে। আমালৈ অহা খবৰ অনুসৰি ইতিমধ্য মণিপুৰ ৰাজ্যই ইয়াৰ অসমৰ সৈতে থকা সীমান্ত অঞ্চলত নিৰাপত্তা ব্যৱস্থাৰ পুনৰীক্ষণ কৰি আছে। অসম-মণিপুৰ সীমান্তই দি অসমৰ পৰা যাতে অবৈধ বিদেশী নাগৰিক প্ৰৱেশ কৰিব নোৱাৰে তাৰ বাবে এক পৰীক্ষণ চকীৰ ব্যৱস্থা কৰিছে। সীমান্তই দি যাতে এন আৰ চিত নাম নথকা কোনো বহিৰাগত (অসমৰ পৰা যোৱা) প্ৰৱেশ কৰিব নোৱাৰে তাৰ বাবে এই পৰীক্ষা চকীৰ ব্যৱস্থা কৰিছে বুলি জানিব পৰা গৈছে। এই শংকাতে অসম-মণিপুৰ সীমান্তৰ জিৰিবাম জিলাৰ আৰক্ষীয়ে ইতিপূৰ্বে জিৰি নদীৰ ওপৰৰ ছখন বাঁহৰ দলং ভাঙি পেলাইছে। এই ফালেদি বিশেষকৈ নিৰাপত্তা চকীৰ সন্মুখীন হ’ব নোখোজা লোকসকলে ৰাজ্যখনত প্ৰৱেশ কৰে।
যোৱা ৩১ ডিচেম্বৰৰ ৰাতি এন আৰ চিৰ প্ৰথমখন খচৰা প্ৰকাশ কৰাৰ পিছতে ৰাজ্যখনৰ আৰক্ষী সঞ্চালক প্ৰধান এল এম খৌতে অসম-মণিপুৰ সীমান্তৰ নিৰাপত্তা ব্যৱস্থাৰ পৰ্য্যালোচনা কৰে। এই সন্দৰ্ভত মুখ্য মন্ত্ৰী বীৰেন সিঙে কয়, ‘অতিৰিক্ত সংখ্যক আৰক্ষী আৰু অৰ্ধ-সামৰিক বাহিনীৰ জোৱানক জিৰিবাম জিলাত মোতায়েন কৰা হৈছে, যাতে অবাঞ্ছিত মানুহ প্ৰৱেশ কৰিব নোৱাৰে।’
জানিব পৰা মতে অসম-নাগালেণ্ড-মণিপুৰক সংযোগ কৰা ২ নং ৰাষ্ট্ৰীয় পথৰে যাব পৰা মাও গেইটতো নিৰাপত্তা ৰক্ষী মোতায়েন কৰা হৈছে। আনহাতে অসম-তামেংলং ৰাষ্ট্ৰীয় পথ আৰু উখৰুল জিলাৰ জেছামিতো আৰক্ষীৰ লোক ৰখাৰ ব্যৱস্থা কৰা হৈছে।
সূত্ৰটোৱে জনোৱা মতে জিৰিবাম জিলাত নিৰাপত্তা ৰক্ষীয়ে পৰিচয় পত্ৰ নথকা কিছু সংখ্যক লোকক আটক কৰিছে। ইয়াৰে কিছুমানৰ নকল ভোটাৰ কাৰ্ড থকা বুলি সূত্ৰটোৱে কয়।
