চলিত এপ্ৰিল মাহৰ ৩০ তাৰিখৰ ভিতৰত অসমৰ সকলো মথাউৰিৰ মেৰামতি সম্পূৰ্ণ কৰিবলৈ মুখ্য মন্ত্ৰী সৰ্বানন্দ সোণোৱালে ৰাজ্যৰ জিলা উপায়ুক্তসকলক নিৰ্দেশ দিছে। আনহাতে লখিমপুৰ জিলা প্ৰশাসনক নজনোৱাকৈ যাতে নীপক’ৱে ৰঙানদী প্ৰকল্পৰ পানী এৰিব নোৱাৰে তাক নিশ্চিত কৰাৰ বাবে তৎকালীনভাৱে নীপক’ কৰ্তৃপক্ষৰ সৈতে যোগাযোগ কৰিবলৈ লখিমপুৰৰ উপায়ুক্তক নিৰ্দেশ দিছে মুখ্য মন্ত্ৰীয়ে।
মথাউৰি মেৰামতি কামৰ গুণগত মান অক্ষুন্ন থকাটো নিশ্চিত কৰিবলৈ উপায়ুক্তসকলক নিৰ্দেশ দিয়াৰ লগতে কোৱা হৈছে ‘প্ৰতিগৰাকী উপায়ুক্তই বানপানী আৰু গৰাখহনীয়াৰ সম্ভাৱনা থকা বিপদ সংকুল ঠাইসমূহ চিনাক্ত কৰিব লাগিব আৰু স্থানীয় জনসাধাৰণ, বিভিন্ন সংগঠনক লৈ সমিতি গঠন কৰিব লাগিব।’
ভিডিঅ’ কনফাৰেন্সিং যোগে ৩ এপ্ৰিলত দিচপুৰৰ পৰা জিলাসমূহৰ উপায়ুক্তসকলৰ সৈতে হোৱা মুখ্য মন্ত্ৰীৰ বৈঠকত উপায়ুক্তসকলক মুখ্য মন্ত্ৰীয়ে বিভিন্ন নিৰ্দেশ দিয়া বুলি মুখ্য মন্ত্ৰী কাৰ্য্যালয়ৰ পৰা এন ই নাওলৈ অহা এক বিবৃতিত কোৱা হৈছে।
বানপানীৰ সময়ত উদ্ধাৰ আৰু সাহায্য অভিযান তৎকালে কৰিব পৰাকৈ প্ৰস্তুত হ’বলৈ উপায়ুক্তসকলক নিৰ্দেশ দিয়া হৈছে।
আনহাতে শেহতীয়া ধুমুহা-বৰষুণত ক্ষতিগ্ৰস্ত হোৱা পৰিয়ালসমূহৰ জৰীপ শীঘ্ৰে সম্পূৰ্ণ কৰি ক্ষতিগ্ৰস্ত লোকসকৰ তালিকা স্থানীয় বিধায়ক-সাংসদে পোৱাতো নিশ্চিত কৰিবৰ বাবে উপায়ুক্তসকলক নিৰ্দেশ দিয়া হৈছে।
আন্তঃৰাষ্ট্ৰীয় সীমান্তৰ সৈতে সংলগ্ন জিলাসমূহৰ উপায়ুক্তসকলক সীমাৰ বেৰা নিৰ্মাণৰ কাম খৰতকীয়া কৰা বাবে বৈঠকত নিৰ্দেশ দিয়া হৈছে।
জিলা পৰ্য্যায়ৰ নিয়োগ প্ৰক্ৰিয়া নিকা কৰিবৰ বাবে সংশ্লিষ্ট বিভাগৰ শীৰ্ষ বিষয়াৰ পৰা অনুমতি ল’ব লাগিব বুলি মুখ্য মন্ত্ৰীয়ে নিৰ্দেশ দিছে। জিলাসমূহত থকা চৰকাৰী খালী ভূমিসমূহ জৰীপ কৰা আৰু মাটি কিনা-বেচাৰ ক্ষেত্ৰত আপত্তিহীনতাৰ প্ৰমাণ পত্ৰ দি্য়াত গাফিলতি নকৰিবলৈও নিৰ্দেশ দিয়া হৈছে।
