মণিপুৰ বিধানসভাৰ ১১ তম শীতকালীন অধিৱেশনখনি অহা ২০ ডিচেম্বৰৰ পৰা আৰম্ভ হ’ব। বিধানসভাৰ এক সূত্ৰৰ পৰা জানিব পৰা মতে বিধানসভাৰ বাণিজ্যিক উপদেষ্টা সমিতিৰ এক বৈঠকত যোৱা বুধবাৰে এই সিদ্ধান্ত গ্ৰহণ কৰা হৈছে।
২৩ ডিচেম্বৰলৈকে অধিৱেশনখনি চাৰিদিনৰ বাবে বিৰতিহীনভাৱে চলিব আৰু প্ৰথম দিনটোত বিধানসভাৰ প্ৰয়াত প্ৰাক্তন সদস্য ৰিশ্বাং কেইশ্বিং, ছালাম দামোদৰ, টি এইচ কৃষ্ণ আৰু যুগেশ্বৰৰ প্ৰতি শ্ৰদ্ধাঞ্জলি জনোৱা হ’ব।
উক্ত দিনটোতে চৰকাৰে যদি কোনো বিধেয়ক থাকে তেতিয়া সেয়া সদনত উত্থাপন কৰিব।
২১ তৰিখৰ পৰা ২৩ তাৰিখলৈ প্ৰতিদিনে প্ৰশ্নোত্তৰ প্ৰসংগৰ লগতে অন্যান্য কাৰ্যসূচীসমূহ থকিব।
২৩ ডিচেম্বৰত প্ৰশ্নকালীন সময়ৰ উপৰি চৰকাৰে উত্থাপন কৰা বিধেয়কৰ ওপৰত আলোচনা কৰা হ’ব আৰু সেইদিনাই বিধেয়ক গৃহিত কৰা হ’ব। মণিপুৰ বিধানসভাৰ সচিব এম ৰমণী দেৱীয়ে জাৰি কৰা অধিৱেশনৰ কাৰ্যসূচীত এই কথা প্ৰকাশ পাইছে।
আনহাতে, সচেতন মহলে দাবী কৰে যে এই অধিৱেশনতে নাগালিম চুক্তি সম্পৰ্কত বিধানসভা উত্তপ্ত হোৱাৰ সম্ভাৱনা আছে। মুখ্যমন্ত্ৰী এন বীৰেণ সিঙে অৱশ্যে নাগালিম সম্পৰ্কত তেওঁৰ স্থিতি ইতিমধ্যে স্পষ্ট কৰিছে আৰু ৰাজ্যখনৰ বিৰোধী দলৰ পৰা তেওঁক বিৰোধ কৰাৰ কোনো কাৰণ বিচাৰি পোৱা নাই।
