মণিপুৰ চৰকাৰে অহা ১৫ মাৰ্চৰ ভিতৰত অৰ্থনৈতিকভাৱে দুৰ্বল পৰিয়ালৰ শিশুৰ বাবে এক শিক্ষা আঁচনি আৰম্ভ কৰাৰ পৰিকল্পনা কৰিছে।
নতুন আঁচনিৰ অধীনত ৰাজ্য চৰকাৰে নৱম আৰু দশম শ্ৰেণীত পঢ়ি থকা ছাত্ৰ-ছাত্ৰীৰ বাবে কিতাপ-পত্ৰ, নামভৰ্তি মাচুল আৰু ইউনিফৰ্মৰ সকলো খৰচ বহন কৰিব।
মুখ্যমন্ত্ৰী এন বীৰেন সিঙে বুধবাৰে মণিপুৰৰ পূব ইম্ফল জিলাৰ টুমুখং মৈৰাংপুৰেলত কৰ্মচাৰীৰ আৱাসৰ সৈতে এটা প্ৰাথমিক স্বাস্থ্যকেন্দ্ৰ আৰু এটা গ্ৰাম্য বজাৰ গৃহ উদ্বোধন কৰাৰ সময়ত এই কথা ব্যক্ত কৰে।
দৰিদ্ৰতাৰ বাবে ৰাজ্যখনত বিদ্যালয় পৰিত্যাগ কৰা ছাত্ৰ-ছাত্ৰীৰ সংখ্যাৰ কথা বিবেচনা কৰি এই পদক্ষেপ গ্ৰহণ কৰা হৈছে।
ৰাজ্যখনত চৰকাৰী নিযুক্তিৰ ক্ষেত্ৰত সৰ্বনিম্ন শিক্ষাগত অৰ্হতা দশম শ্ৰেণী উত্তীৰ্ণ হোৱালৈ চাই দশম শ্ৰেণীৰ শিক্ষা সম্পূৰ্ণ হোৱালৈকে অৰ্থনৈতিকভাৱে দুৰ্বল পৰিয়ালৰ ল’ৰা-ছোৱালীক সহায় কৰাটোৱে আঁচনিখনৰ লক্ষ্য।
চৰকাৰে দুখীয়া ছাত্ৰ-ছাত্ৰীসকলক মেট্ৰিক উত্তীৰ্ণ হোৱাত সহায় কৰাৰ সিদ্ধান্ত গ্ৰহণ কৰিছে বুলি মুখ্যমন্ত্ৰী বীৰেন সিঙে জানিবলৈ দিয়ে।
তেওঁ লগতে আশ্বাস দিয়ে যে তেওঁ মৈৰাংপুৰেল চৰকাৰী উচ্চ মাধ্যমিক বিদ্যালয়খন এখন উচ্চতৰ মাধ্যমিক বিদ্যালয়লৈ উন্নীত কৰাৰ বাবে সম্ভাৱ্য সকলো প্ৰচেষ্টা হাতত ল’ব।
তেওঁ নতুনকৈ উদ্বোধন কৰা প্ৰাথমিক স্বাস্থ্যকেন্দ্ৰটোত যিমান পাৰি সোনকালে প্ৰয়োজনীয় চিকিৎসক আৰু স্বাস্থ্যকৰ্মী নিয়োগ কৰা হ’ব বুলি জানিবলৈ দিয়ে।
উপাধ্যক্ষ কে ৰবীন্দ্ৰো, থাংগাৰ বিধায়ক তথা পিডিএৰ অধ্যক্ষ টি ৰবীন্দ্ৰো, ৱাংগইৰ বিধায়ক অ’ লুখই, কাকচিঙৰ বিধায়ক ওৱাই সুৰচন্দ্ৰ, ৱাংজিঙ টেন্থাৰ বিধায়ক পি ব্ৰজেন, কেইৰাওৰ বিধায়ক এল ৰামেশ্বৰ, ছেকমাইৰ বিধায়ক এইচ ডিংগো, ওৱাইছকুলৰ বিধায়ক টিএইচ সত্যব্ৰত, অতিৰিক্ত মুখ্য সচিব (গৃহ) ড০ জে সুৰেশ বাবু আৰু পূব ইম্ফল জিলাৰ উপায়ুক্ত টিএইচ চিত্ৰা অনুষ্ঠানত উপস্থিত আছিল।
