আই পি এলৰ ফাইনেল মেচত অসমত বাজি লগালে বহু জুৱাৰীয়ে : শিলচৰত ছজনক আটক

বিশ্বৰ ভিতৰতে অন্যতম বৃহৎ পৰিমাণৰ ধন বিনিয়োগ হোৱা ক্ৰিকেট প্ৰতিযোগিতা আই পি এলৰ একাদশ সংস্কৰণৰ আজি যোৱা নিশা হৈ যোৱা চূড়ান্ত প্ৰতিযোগিতাক কেন্দ্ৰ কৰি অসমত চলিল বৃহৎ পৰিমাণৰ ধনৰ বাজি। কিছুমান অসমৰ্থিত সূত্ৰই এই বাজিত বহুজন সৰ্বাস্বান্ত হোৱা বুলি দাবী কৰিছে।

আনহাতে শিলচৰত যোৱা নিশা চেন্নাই ছুপাৰ কিংছ আৰু ছানৰাইজ হাইদৰাবাদৰ মাজত হোৱা এই চূড়ান্ত প্ৰতিযোগিতাখনত বাজি লগোৱা আৰু জুৱা অনুষ্ঠিত কৰা এটা চক্ৰক আৰক্ষীয়ে উৎখাত কৰাৰ লগতে ছজনক আটক কৰাৰ খবৰ আহিছে। এই চক্ৰটোৱে শিলচৰ চহৰৰ নৰসিংহটোলাৰ সিদ্ধাৰ্থ হোটেলৰ ১০৭ নং কোঠাত জুৱাৰ আড্ডা আৰু বাজি চলাই আছিল।

শিলচৰ আৰক্ষীয়ে অভিযান চলাই স্থানীয় ছগৰাকী ক্ৰিকেট জুৱাৰী ক্ৰমে বিশাল ৰয়, প্রমিত দেব, অভিষেক ৰয়, সৌৰভ ৰয়, বাবলু লস্কৰ আৰু শোভন কৰ দেব। আৰক্ষীয়ে তেওঁলোকৰ পৰা ছটা ম’বাইল আৰু এখন মাৰুতি ছুজুকী গাড়ীও জব্দ কৰে।

উল্লেখযোগ্য যে আই পি এলক কেন্দ্ৰ কৰি বাজি ধৰা আৰু জুৱা খেলাৰ প্ৰকোপ এইবাৰ অসমত বহু বেছি হোৱা দেখা গ’ল। আৰক্ষীৰ তৎপৰতা সত্ত্বেও এই ক্ৰিকেট জুৱাই অসমৰ বিভিন্ন ঠাইত মহামাৰীৰ ৰূপ লোৱা দেখা গ’ল। বৰপেটাত যোৱা ২০ মে’ত গীতাৰ্থ পাঠক নামৰ এজন ক্ৰিকেট জুৱাৰীয়ে বাজিত হাৰি আত্মহত্যাৰ পথ লৈছিল।