আকৌ আতংকময় দিনবোৰৰ ভয়ে খেদিবলৈ ধৰিছে উজনিৰ ৰাইজক

আতংকৰ দিনবোৰৰ কথাই সমগ্ৰ ৰাজ্যবাসীৰ মনত যে আকৌ খুন্দিয়াবলৈ ধৰিছে সেই কথাৰ প্ৰমাণ পোৱা গ’ল আজিৰ ডিব্ৰুগড়ৰ এটা সৰু ঘটনাত। যোৱা ১১ ডিচেম্বৰত তিনিচুকীয়াৰ বৰডুমচাৰ সোণজান গাৱঁত আলফাই পিতা-পুত্ৰ গুলীয়াই হত্যা কৰাৰ পিছত ৰাজ্যবাসী এতিয়া শান্তিপূৰ্ণ অসম দিয়াৰ চৰকাৰী আশ্বাসত আশ্বস্ত যে হোৱা নাই তাৰো প্ৰমাণ পোৱা গ’ল আজিৰ ঘটনাটোত। কালি ডিব্ৰুগড় চহৰৰ মাজমজিয়াৰ আমোলাপট্টিত এখন ট্ৰেভেলাৰত থকা এটা গৰাকীবিহীন মোনাই ৰাইজ আৰু প্ৰশাসনক প্ৰায় এক ঘণ্টা উৎকণ্ঠাত ৰাখিলে। জানিব পৰা মতে যোৰহাটোৰ পৰা ডিব্ৰুগড়লৈ যোৱা এখন ট্ৰেভেলাৰত কোনোবাই এই বেগটো প্ৰেৰণ কৰিছিল। কিন্তু বেগটো সংগ্ৰহ কৰিব লগীয়া মানুহজন ভালেমান পৰলৈকে নহাত আৰু বেগটো কোনে পঠিয়াইছে সেইটো স্পষ্ট নোহোৱাত গাড়ীখনৰ গৰাকীয়ে আৰক্ষীক খবৰ দিয়ে। আৰক্ষী ঘটনাস্থলীত উপস্থিত হৈ বেগটো নিজৰ জিম্মাত লয়। পিছত ইয়াক মোহনঘাটৰ এখন ঠাইলৈ নি সেনাৰ দ্বাৰা পৰীক্ষা কৰায়। সেনাৰ বোমা বিশেষজ্ঞই মোনাটোত বিস্ফোৰক সামগ্ৰ আছে বুলি কয়। আনপিনে টেলিভিশ্যনত এই খবৰ সম্প্ৰচাৰিত হোৱাৰ লগে লগে ৰিতেশ জালান নামৰ মোনাটো সংগ্ৰহ কৰিব লগীয়া লোকজন আহি উপস্থিত হয় আৰু মোনাটো তেওঁৰ বুলি কয়। জালানে জানিবলৈ দিয়ে যে তেৱেঁ এখন বিয়াত ফুটাবলৈ ফটকা আদি অনাইছিল। কিন্তু বিশেষ অসুবিধা হেতু সময়ত বেগটো চমজি ল’বলৈ আহিব পৰা নাছিল। এই কথা জানিবলৈ দিয়ে ডিব্ৰুগড় আৰক্ষী থানাৰ ভাৰপ্ৰাপ্ত বিষয়া সিদ্ধেশ্বৰ বৰাই।

উল্লেখযোগ্য যে যদিও ঘটনাটো এটা সাধাৰণ ভুল বুজাবুজি তথা যোগাযোগৰ বিফলতাৰ নমুনা, ইয়ে এটা কথা প্ৰমাণ কৰি দিলে যে উজনি অসমৰ মানুহ ভিতৰি ভিতৰি কিমান আতংকিত হৈ আছে। তেওঁলোকক যে সততে নিৰাপত্তাৰ শংকাই খেদি ফুৰিছে সেয়া এই ঘটনাটোৰ দ্বাৰাই প্ৰমাণ হৈছে।