অসম চৰকাৰৰ ক্ৰীড়া আৰু যুৱকল্যাণ বিভাগৰ পৰীক্ষা বাতিলৰ বিষয়ে আগতীয়াকৈ নজনাই হঠাতে পৰীক্ষা বাতিল কৰা বুলি ঘোষণা কৰাত পৰীক্ষা দিবলৈ আহি উপস্থিত হোৱা প্ৰাৰ্থীসকলে প্ৰতিবাদেৰে উত্তাল কৰি তুলিলে সৰুসজাই ষ্টেডিয়াম চৌহদত থকা পৰীক্ষা কেন্দ্ৰ।
পঞ্চায়ত আৰু গ্ৰামোন্নয়ন বিভাগৰ পৰীক্ষাত হোৱা খেলিমেলিৰ পাছতে শনিবাৰে ৰাজ্য চৰকাৰৰ ক্ৰীড়া আৰু যুৱকল্যাণ বিভাগৰ কেইবাটাও পদৰ বাবে অনুষ্ঠিত হ’বলগীয়া পৰীক্ষা আচম্বিতে বাতিল কৰা হয়।
ক্ৰীড়া আৰু যুৱ কল্যাণ বিভাগত মুঠতে ১৭টা কনিষ্ঠ সহায়ক পদৰ বাবে শনিবাৰে লিখিত পৰীক্ষা অনুষ্ঠিত হোৱাৰ কথা আছিল। পৰীক্ষাৰ বাবে কেন্দ্ৰ আছিল গুৱাহাটীৰ সৰুসজাই ষ্টেডিয়ামত থকা কৰ্মবীৰ নবীনচন্দ্ৰ বৰদলৈ ইনডোৰ ষ্টেডিয়াম।
পূৰ্বনিৰ্ধাৰিত সময়সূচী অনুসৰি ৰাজ্যখনৰ বিভিন্ন প্ৰান্তৰ পৰা পৰীক্ষাৰ্থীসকলে শুকুৰবাৰে আহি গুৱাহাটীত উপস্থিত হয় আৰু শনিবাৰে পুৱা পৰীক্ষা দিবলৈ সৰুসজাই ষ্টেডিয়ামত উপস্থিত হয় যদিও পৰীক্ষাকেন্দ্ৰলৈ গৈ প্ৰাৰ্থীসকল হতভম্ব হৈ পৰে। কিয়নো কৰ্মবীৰ নবীনচন্দ্ৰ বৰদলৈ ইনড’ৰ ষ্টেডিয়ামত ক্ৰীড়া আৰু যুৱ কল্যাণ বিভাগে অনিবাৰ্য কাৰণবশতঃ বিভাগটোৰ অনুষ্ঠিত হ’বলগীয়া পৰীক্ষা অনিৰ্দিষ্ট কাললৈ পিছুৱাই দিয়া হৈছে বুলি এখন জাননী আঁৰি থোৱা আছিল।
স্বাভাৱিকতে পৰীক্ষা বাতিলৰ এই খবৰ পাই পৰীক্ষা দিবলৈ উপস্থিত হোৱা প্ৰাৰ্থীসকল ক্ষোভত ফাটি পৰে। বিভিন্ন স্থানৰ পৰা পৰীক্ষা দিবলৈ অহা ছাত্ৰ-ছাত্ৰীসকলৰ ক্ষোভৰ মূল কাৰণ হ’ল যদি পৰীক্ষা বাতিল কৰা হৈছে তেন্তে আগতীয়াকৈ কিয় খবৰ দিয়া নহ’ল। প্ৰাৰ্থীসকলক ইমান হাৰাশাস্তি দিয়াৰ বিষয়টোক লৈ উত্তেজিত হৈ পৰা প্ৰাৰ্থীসকলে চৰকাৰবিৰোধী শ্ল’গান দি পৰিস্থিতি উত্তাল কৰি তোলে।
প্ৰাৰ্থীসকলৰ এই ক্ষোভৰ উমান ল’বলৈ তাত ক্ৰীড়া আৰু যুৱ কল্যাণ বিভাগৰ কোনো বিষয়া-কৰ্মচাৰী উপস্থিত নাছিল। জিলা পৰ্যায়ৰ কনিষ্ঠ সহায়ক পদৰ পৰীক্ষা আচম্বিতে বাতিল কৰাৰ বিষয়টোক লৈ স্বাভাৱিকতে ৰাজ্যজুৰি প্ৰতিক্ৰিয়াৰ সৃষ্টি হৈছে।
জানিব পৰা মতে পূৰ্বনিৰ্ধাৰিত সময়সূচী অনুসৰি পৰীক্ষা অনুষ্ঠিত হ’ব বুলি আবেদনকাৰীসকললৈ এডমিট কাৰ্ডো প্ৰেৰণ কৰা হৈছিল। আবেদনকাৰীসকলে বিভাগটোৱে কি কাৰণত কোনো আগজাননী নিদিয়াকৈ শেষ মুহূৰ্তত পৰীক্ষা বাতিল কৰিলে তাক লৈ ক্ষোভ ব্যক্ত কৰে।
আনহাতে, শনিবাৰে বাতিল হোৱা পৰীক্ষা পুনৰ অনুষ্ঠিত হ’ব নে নহয় অথবা কেতিয়াকৈ পৰীক্ষা অনুষ্ঠিত হ’ব সেই সন্দৰ্ভত তোনো তথ্য ক্ৰীড়া আৰু যুৱকল্যাণ বিভাগে অৱগত কৰোৱা নাই। বিভাগটোৰ এনে কাণ্ডজ্ঞানহীন কাৰ্যক সকলোৱে একেমুখে ধিক্কাৰ দিছে।
