আনুষ্ঠানিকভাৱে এ আই য়ু ডি এফৰ পৰা পদত্যাগ কৰিলে ভৱানীপুৰৰ বিধায়ক ফনীধৰ তালুকদাৰে
ভৱানীপুৰ সমষ্টিৰ এ আই য়ু ডি এফ বিধায়ক ফনীধৰ তালুকদাৰে আজি আনুষ্ঠানিকভাৱে দলৰ পৰা পদত্যাগ কৰিছে।
এ আই য়ু ডি এফৰ প্ৰাথমিক সদস্য পদ ত্যাগ কৰাৰ কথা ঘোষণা কৰিছে ফনীধৰ তালুকদাৰে।
মঙলবাৰে এ আই য়ু ডি এফৰ সভাপতিলৈ এখন পত্ৰ প্ৰেৰণ কৰি তেওঁ দলত্যাগ কৰা বুলি ঘোষণা কৰিছে।
আনহাতে, দুই এদিনতে গেৰুৱা সাজ পিন্ধিব ফনীধৰ তালুকদাৰে।
অৱশ্যে, দল ত্যাগৰ লগে লগে তালুকদাৰে তেওঁৰ বিধায়ক পদো এৰিব লাগিব। ফলত ভৱানীপুৰ সমষ্টিতো উপনিৰ্বাচন অনুষ্ঠিত
হোৱাটো নিশ্চিত হৈ পৰিল।
ইয়াৰ ফলত এতিয়া অসমৰ মুঠ ৬ টা সমষ্টিত উপ-নিৰ্বাচন অনুষ্ঠিত হ’ব।
বিগত কেইবাটাও বিধানসভা নিৰ্বাচনত ভৱনীপুৰ সমষ্টিৰ নিৰ্দলীয় প্ৰাৰ্থী হৈ প্ৰতিদ্বন্দ্বিতা কৰি আহিছিল যদিও ফনীধৰ তালুকদাৰে প্ৰতিবাৰেই পৰাজয় বৰণ কৰাৰ পাছত ২০২১ৰ নিৰ্বাচনত এ আই য়ু ডি এফৰ টিকটত পোন প্ৰথমবাৰৰ বাবে বিধায়ক হোৱাৰ সপোন পূৰণ হৈছিল ফনীধৰ তালুকদাৰৰ।
কিন্তু মাত্ৰ চাৰিটা মাহতে দলত্যাগ কৰি অন্য দললৈ ঢাপলি মেলাৰ সিদ্ধান্ত ল’লে ভৱানীপুৰৰ বিধায়কজনে।
অৱশেষত ৰূপজ্যেতি কূৰ্মী, সুশান্ত বৰগোহাঁইৰ দৰে একে পথৰে পথিক হ’বলৈ আগবাঢ়িছে ভৱানীপুৰৰ ফনীধৰ তালুকদাৰ।