আধুনিক আৰু মুক্ত চিন্তাৰ ক্ষেত্ৰত এখোজ আগুৱালে চুবুৰীয়া দেশ বাংলাদেশে। চুবুৰীয়া ৰাষ্ট্ৰখনৰ ইতিহাসত প্ৰথমবাৰৰ বাবে সমকামী বিবাহ সম্পন্ন হৈছে, সেয়াও আকৌ মুকলিকৈ। বাংলাদেশৰ ঐতিহাসিক ঢাকেশ্বৰী মন্দিৰত এই বিবাহ সম্পন্ন হয়। দেৱীক সাক্ষী কৰি বিবাহপাশত আৱদ্ধ হয় এই প্ৰেমিক যুগল।
জন্মসূত্ৰে পুৰুষ হ’লেও পৰৱৰ্তী সময়ত নাৰী হিচাপে আত্মপ্ৰকাশ কৰিছিল তসনুভা আনান শিশিৰে। ঐতিহ্যমণ্ডিত ঢাকেশ্বৰী মন্দিৰত সনাতন হিন্দু ধৰ্মীয় ৰীতি-নীতিৰে নিজৰ প্ৰেমিকৰ সৈতে বিবাহপাশত আৱদ্ধ হয় তেওঁ। ছচিয়েল মিডিয়াত ইতিমধ্যে ভাইৰেল হৈ পৰিছে এই বিয়াৰ অনুষ্ঠানৰ ছবি। তাত শিশিৰক শাখা-পলা পৰিধান কৰা দেখা গৈছে। লগতে শিৰত সেন্দূৰ লৈ একেবাৰে নতুন বোৱাৰীৰ ৰূপত দেখা গৈছে তেওঁক।
ইয়াৰ পূৰ্বে ২০২১ চনৰ আন্তৰ্জাতিক নাৰী দিৱসত বৈশাখী টিভি নামৰ টেলিভিছন চেনেলত বাতৰি পঢ়ি বাংলাদেশৰ প্ৰথমগৰাকী ট্ৰান্সজেণ্ডাৰ বা সমকামী সংবাদ পাঠিকা হিচাপে ইতিহাস ৰচিছিল শিশিৰে। বাংলাদেশত কাম কৰাৰ ক্ষেত্ৰত বিভিন্ন সামাজিক প্ৰত্যাহ্বান আৰু বাধাৰ সন্মুখীন হোৱাৰ পিছত তেওঁ আমেৰিকা যুক্তৰাষ্ট্ৰলৈ গুচি যায়। অৱশ্যে শেহতীয়াকৈ পৰম্পৰাগত সনাতন ৰীতিৰে সম্পন্ন হোৱা তেওঁৰ এই বিবাহে দেশৰ সীমা অতিক্ৰম কৰি এক নতুন আৰু যুগান্তকাৰী অধ্যায়ৰ সূচনা কৰিছে।
ইয়াৰ পূৰ্বেও পৃথিৱীৰ বিভিন্ন দেশ বহু সমকামী বিবাহৰ সাক্ষী হৈছে। বাংলাদেশৰ এই প্ৰথমখন সমকামী বিবাহক লৈ নেটিজেনসকলৰ ফালৰ পৰা মিশ্ৰিত প্ৰতিক্ৰিয়া দেখিবলৈ পোৱা গৈছে।
