আৰএছএছৰ নিৰ্দেশত চলিছে এনআৰচিৰ কাম, সেয়ে কৰ্তন হৈছে অসমীয়া মুছলমানৰ নাম : তৰুণ গগৈ
‘আৰ এছ এছৰ নিৰ্দেশত চলি আছে এন আৰ চি উন্নীতকৰণৰ কাম । সেয়ে বেছিকৈ কৰ্তন হৈছে অসমীযা মুছলমান লোকৰ নাম’। এই মন্তব্য প্ৰাক্তন মুখ্য মন্ত্ৰী তৰুণ গগৈৰ।
বুধবাৰে কইনাধৰাস্থিত বাসগৃহত প্ৰাক্তন মুখ্য মন্ত্ৰী তৰুণ গগৈয়ে এখন সংবাদমেল সম্বোধন কৰি আৰএছএছৰ বিৰুদ্ধে এই গুৰুতৰ অভিযোগ উত্থাপন কৰে। তেওঁ লগতে কয়, ‘ন্যায়ালয়ৰ নিৰ্দেশ মতে হ’ব লাগিছিল এন আৰ চিৰ কাম। কিন্তু হৈ আছে আৰএছএছৰ নিৰ্দেশত। সেয়া হ’লে দেশ ক’ত চলিব?’
তদুপৰি সীমা সুৰক্ষা বাহিনীয়ে ভাৰতীয় নাগৰিকক ডি-ভোটাৰ সজোৱা বুলি অভিযোগ আনি গগৈয়ে কয়, ‘সীমা সুৰক্ষা বাহিনীয়ে যাকে-তাকে কোনো চিন্তা নকৰাকৈ প্ৰকৃত ভাৰতীয় নাগৰিকক ডি-ভোটাৰ কৰি তেওঁলোকক বিদেশী ন্যায়াধীকৰণলৈ পঠাই দিছে’।
ডি-ভোটাৰ সজোৱা লোকসকলৰ নথি-পত্ৰত নাম নাথাকিলে তেওঁলোকক বিদেশী সজোৱাত কোনো আপত্তি নাই। কিন্তু যি ধৰ্ম বা ভাষাৰ নহওঁক ভাৰতীয় নাগৰিকৰ নাম কৰ্তন হ’ব নালাগে বুলি স্পষ্ট ৰূপত তেওঁ উল্লেখ কৰে।
তেওঁ লগতে কয় ‘সীমা সুৰক্ষা বাহিনীয়ে অলপো চিন্তা নকৰাকৈ আইনৰ অৱমাননা কৰিছে। সেয়ে আইন অৱমাননা কৰাৰ অপৰাধত নিয়মমতে তেওঁলোকৰ ওপৰত গোচৰ ৰুজু কৰিব লাগে’।
আনহাতে, ১৯৩৭ চনৰ পৰা ১৯৪৬ চনলৈকে অসম বিধানসভাৰ উপাধ্যক্ষ হিচাপে কাৰ্যনিৰ্বাহ কৰা মৌলৱী মহম্মদ আমিৰুদ্দিনৰ নাতিনীয়েকসকল অসমত জন্ম হোৱাৰ পাছতো তথা ২০০৫ চনৰ পৰা ২০১৮ চনৰ ভোটাৰ তালিকাত নাম থকা স্বত্বেও তেওঁলোকক ডি-ভোটাৰ সজোৱা হোৱাটো দুৰ্ভাগ্যজনক বুলি গগৈয়ে সংবাদমেলত কয়।
উল্লেখ্য যে এন আৰ চিৰ পৰা নাম কাট খোৱা বেছিভাগেই দৰিদ্ৰ আৰু অশিক্ষিত। এন আৰচিৰ জৰিয়তে বিদেশী সমস্যা সমাধান কৰিব বিচৰাতকৈ নতুন সমস্যাৰহে সৃষ্টি কৰিব বিচাৰিছে এই চৰকাৰখনে।
গগৈয়ে কয় ‘এফালে সীমা সুৰক্ষা বাহিনীৰ অত্যাচাৰ, আনফালে বিদেশী ন্যায়াধিকৰণৰ ন্যায়াধীশসকলে যিধৰণে ন্যায় বিচাৰ কৰিব লাগিছে সেই ধৰণে কৰা নাই। যাৰ ফলত ভাৰতীয় নাগৰিকেই ডিটেনশ্যন কেম্পত থাকিবলগীয়া হৈছে’।
ডি-ভোটাৰ সজাই ডিটেনশ্বন কেম্পলৈ পঠোৱাৰ ফলত ভাৰতীয় নাগৰিকৰ মৌলিক অধিকাৰ খৰ্ব হৈছে সেয়েহে ন্যায়াধীশ কেইজনকো দোষাৰোপ কৰিব লাগে বুলি প্ৰাক্তন মুখ্য মন্ত্ৰীগৰাকীয়ে মন্তব্য কৰে।
‘প্ৰকৃত ভাৰতীয় নাগৰিকসকলে এনআৰচিৰ নামত যথেষ্ট হাৰাশাস্তিৰ সন্মুখীন হৈছে সেয়ে এই বিষয় সমূহ লৈ মই উচ্চতম ন্যায়ালয়ৰ কাষ চাপিম’। তৰুণ গগৈৰ মন্তব্য।
হিন্দু ধৰ্ম প্ৰতিষ্ঠাৰ নামত অসমীয়াক সংখ্যালঘু কৰাৰ চেষ্টা চলাইছে বিজেপিয়ে। এইদৰে কটাক্ষ কৰি তেওঁ লগতে বিজেপি চৰকাৰক প্ৰশ্ন কৰি কয় ‘আমাৰ মতে আমি অসমীয়াও হৈ থাকিম, হিন্দুও হৈ থাকিম, সেইবুলিয়ে নেপাল, আফগানিস্থানৰ পৰা হিন্দু আনি অসমৰ জাতি-মাটি-ভেটি বিক্ৰী কৰি দিম নেকি?’
আনহাতে মৰিগাওঁ জিলাৰ মৈৰাবাৰীৰ মাজিদা খাতুন নামৰ মৈৰাবাৰীৰ মহিলাগৰাকীৰ গিৰিয়েক গাওঁবুঢ়া, তেওঁৰ ককা স্বাধীনতা সংগ্ৰামী হোৱাৰ পিছতো তেওঁক কিয় বিদেশী বুলি ঘোষণা কৰা হ’ল বুলি গগৈয়ে সংবাদমেলত প্ৰশ্ন কৰে।