বিদেশী নাগৰিক সম্পৰ্কত প্ৰদান কৰা ৰায়ৰ সন্দৰ্ভত গুৱাহাটী উচ্চ ন্যায়ালয়ৰ এগৰাকী ন্যায়াধীশৰ বিৰুদ্ধে মন্তব্য কৰা ধিং সমষ্টিৰ বিধায়ক আমিনুল ইছলামৰ বিৰুদ্ধে উচ্চ ন্যায়ালয়ৰ অধিবক্তা প্ৰাণ বৰাই আদালত অৱমাননাৰ এটা ফৌজগাৰী গোচৰ তৰিছে। এই গোচৰৰ ভিত্তিত গুৱাহাটী উচ্চ ন্যায়ালয়ে বিধায়ক আমিনুল ইছলামলৈ জাননী প্ৰেৰণ কৰিছে।
ন্যায়ালয়ে অহা ২৮ ছেপ্টেম্বৰত বিধায়ক আমিনুল ইছলামক সোঁশৰীৰে আদালতত হাজিৰ হ’বলৈ নিৰ্দেশ দিছে। অধিবক্তা প্ৰাণ বৰাই দাখিল কৰা আদালত অৱমাননা (ফৌজদাৰী) গোচৰ নং ১ /২০১৮ ৰ শুনানি গ্ৰহণ কৰি শুকুৰবাৰে ন্যায়াধীশদ্বয় অৰূপ কুমাৰ গোস্বামী আৰু মানস ৰঞ্জন পাঠকৰ খণ্ড বিচাৰপীঠে এই নিৰ্দেশ দিয়ে।
উল্লেখযোগ্য যে যোৱা ১১ জুলাইত বিধায়ক আমিনুল ইছলামে নিজৰ সমষ্টিত এখন সংবাদমেল সম্বোধন কৰি বিদেশী নাগৰিক সংক্ৰান্তীয় ৰায় সন্দৰ্ভত গুৱাহাটী উচ্চ ন্যায়ালয়ৰ এগৰাকী ন্যায়াধীশৰ বিৰুদ্ধে আপত্তিজনক মন্তব্য দাঙি ধৰাৰ তথ্য প্ৰমাণ দাঙি ধৰি অধিবক্তা বৰাই গোচৰটো তৰিছিল।
বিধায়ক ইছলামে উচ্চ ন্যায়ালয়ৰ এগৰাকী ন্যায়াধীশে ঘোষিত বিদেশীৰ গোচৰৰ প্ৰক্ৰিয়া একপক্ষীয়ভাৱে কৰে বুলি অভিযোগ তুলিছিল। বিধায়ক গৰাকীয়ে ন্যায়াধীশগৰাকীয়ে আবেদনকাৰীৰ জন্মৰ তাৰিখ আৰু নামৰ সামান্য হীন ডেঢ়ি হ’লেই বিদেশী বুলি ৰায় দিয়াৰ অভিযোগ আনিছিল।
আনহাতে, এইক্ষেত্ৰত ন্যায়াধীশগৰাকীও সন্দেহৰ আৱৰ্তত বুলি মন্তব্য কৰি বিধায়ক ইছলামে ন্যায়াধীশগৰাকীৰ ভোটাৰ তালিকাত থকা জন্মৰ তাৰিখ আৰু উচ্চ ন্যায়ালয়ৰ ৱেবছাইটত থকা জন্মৰ তাৰিখৰ মাজত মিল নাই বুলি মন্তব্য কৰিছিল। বিধায়ক ইছলামৰ এই সংবাদমেলৰ বাতৰি ৰাজ্যখনৰ বিভিন্ন সংবাদ মাধ্যমত প্ৰচাৰিত হৈছিল।
অধিবক্তা বৰাই বিধায়ক ইছলামৰ উক্ত মন্তব্য তথা অভিযোগ ন্যায়াপালিকাৰ প্ৰতি অসন্মানজনক তথা ন্যায়ালয়ৰ প্ৰতি অৱমাননা বুলি যুক্তি প্ৰদৰ্শন কৰিছে। ইপিনে আদালত অৱমাননাৰ এই গোচৰ তৰিবলৈ প্ৰয়োজন হোৱা মহাধিবক্তাৰ আনুষ্ঠানিক সন্মতিও লোৱা হৈছে বুলি সদৰী কৰিছে অধিবক্তাগৰাকীয়ে।
