ভাৰতীয় ৰে’ল মজদুৰ সংঘৰ উদ্যোগত সমগ্ৰ দেশৰ সমান্তৰালভাৱে আজি গুৱাহাটীৰ মালিগাঁওস্থিত উত্তৰ-পূব সীমান্ত ৰে’লৰ মহাপ্ৰৱন্ধকৰ কাৰ্যালয়ৰ চৌহদত পূৰ্বোত্তৰ সীমান্ত ৰে’লৱে কৰ্মচাৰী সংঘই দিনৰ ১২ বজাৰ পৰা ২ বজালৈকে এক ধৰ্ণা কাৰ্যসূচী ৰূপায়ণ কৰে।
সংঘৰ আহ্বায়ক দেৱাশীষ দত্তই জনোৱা অনুসৰি তেওঁলোকে এই ধৰ্ণা কাৰ্যসূচীৰ জৰিয়তে ‘ৰে’লত পুৰণি পেঞ্চনৰ নিৰিখ প্ৰৱৰ্তন, আয়কৰ ৰেহাই, দৰমহাৰ ন্যূনতম হাৰ বৃদ্ধি, সপ্তম দৰমহা আয়োগৰ দ্বাৰা অনুমোদিত ভাট্টা প্ৰদান, ৰে’লত পোনপটীয়া বিদেশী বিনিয়োগ আৰু আউট চিটিঙ বন্ধ কৰা, ১২ ঘণ্টীয়া কৰ্মৰ সময় বন্ধ কৰা আৰু ট্ৰেকমেনক কাৰিকৰী ব্যক্তিৰ মৰ্যাদা প্ৰদান কৰা’কে ধৰি মুঠ ২৪ টা দাবী উত্থাপন কৰে।
ধৰ্ণা কাৰ্যসূচীৰ অন্তত প্ৰতিবাদকাৰীসকলে মুঠ ১৭ টা জ’নৰ পৰা উত্তৰ-পূব সীমান্ত ৰে’লৱেৰ মহা প্ৰৱন্ধকৰ জৰিয়তে প্ৰধান মন্ত্ৰীলৈ ২৪ টা দাবী সম্বলিত স্মাৰকপত্ৰ প্ৰেৰণ কৰে।
আনহাতে এই দাবীসমূহ পূৰণ কৰাৰ ক্ষেত্ৰত কেন্দ্ৰীয় চৰকাৰৰ ৰে’লৱে বিভাগে যদি কোনো পদক্ষেপ গ্ৰহণ নকৰে তেতিয়া ভাৰতীয় ৰে’ল মজদুৰ সংঘই সংসদ ভৱন ঘেৰাও কৰিবলৈও বাধ্য হ’ব বুলি পূৰ্বোত্তৰ সীমান্ত ৰে’লৱে কৰ্মচাৰীৰ সংঘৰ আহ্বায়ক দেৱাশীষ দত্তই জনায়।
উক্ত প্ৰতিবাদী কাৰ্যসূচীত অংশগ্ৰহণ কৰা ভাৰতীয় ৰে’ল মজদুৰ সংঘৰ কেন্দ্ৰীয় সাংগঠনিক সম্পাদক দিলীপ কুমাৰ চক্ৰৱৰ্তীয়ে ৰে’লৰ ক্ৰমৱৰ্দ্ধমান কাম-কাজৰ বিপৰীতে কৰ্মচাৰীৰ সংখ্যা কমি যোৱা বিষয়টোত গভীৰ উদ্বেগ প্ৰকাশ কৰে।
আজিৰ প্ৰতিবাদী কাৰ্যসূচীত সংঘৰ সভাপতি এন কে ৰয়, সাধাৰণ সম্পাদক গণেশ বড়ো, জিতু হাজৰিকা, ৰঞ্জিত চক্ৰৱৰ্তী, দিলীপ চৰকাৰ, অনিতা সিং, বিশ্বজিৎ চক্ৰৱৰ্তীকে ধৰি বহু সদস্যই অংশগ্ৰহণ কৰে।
