উলানবাটাৰ বক্সিং প্ৰতিযোগিতাত লাভলিনাৰ ৰূপ, শিৱ থাপাৰ ব্ৰঞ্জ
অসমৰ প্ৰতিভাৱান বক্সাৰ তথা বিশ্ব বক্সিং প্ৰতিযোগিতাত ধাৰাবাহিকভাৱে উন্নতমানৰ প্ৰদৰ্শন দাঙি ধৰিবলৈ সক্ষম হোৱা লাভলিনা বৰগোহাঁয়ে আজুৰি আনিবলৈ সক্ষম হৈছে আন এক সফলতা। মংগোলিয়াত সদ্য সমাপ্ত আন্তঃৰাষ্ট্ৰীয় উলানবাটাৰ কাপ প্ৰতিযোগিতাত বক্সাৰ লাভলিনাই অৰ্জন কৰিছে ৰূপৰ পদক।
প্ৰতিযোগিতাখনত প্ৰথম ৰাউণ্ডৰে পৰা দুৰ্দান্ত প্ৰদর্শন দাঙি ধৰিবলৈ সক্ষম হোৱা অসমৰ বক্সাৰগৰাকীয়ে অৱশেষত ফাইনেলত স্তব্ধ হয় চীনা টাইপেইৰ খেলুৱৈ নিয়েন চেনৰ হাতত।
২৪ জুন অৰ্থাৎ দেওবাৰে অনুষ্ঠিত হোৱা প্ৰতিযোগিতাখনৰ ৬৯ কেজি শাখাৰ ফাইনেলত লাভলিনাই চীনা টাইপেৰ খেলুৱৈগৰাকীৰ লগত যথেষ্ট প্ৰত্যাহ্বানৰ সন্মুখীন হয় আৰু অৱশেষত হাৰ মানি ৰূপৰ পদকতে সন্তুষ্ট থাকিবলগীয়া হয়।
ইফালে অসমৰ আন এগৰাকী বক্সাৰ তথা প্ৰাক্তন বিশ্ব বক্সিং চেম্পিয়নশ্বীপৰ ব্ৰঞ্জ পদক বিজয়ী আৰু এছিয়ান গেইমছত তিনিবাৰৰ পদক বিজয়ী শিৱ থাপাইও প্ৰতিযোগিতাখনত ব্ৰঞ্জৰ পদক লাভ কৰে।
উল্লেখ্য যে ৬০ কেজি শাখাত প্ৰতিদ্বণ্ডিতা আগবঢ়োৱা থাপাই আৰম্ভণিৰ মেচসমূহত দূৰ্দান্ত প্ৰদৰ্শন দাঙি ধৰিছিল যদিও ছেমিফাইনেলত ঘৰুৱা প্ৰতিদ্বণ্ডী বাট্টুমুৰ মিছলীটৰ হাতত অতি কম ব্যৱধানত পৰাজয় বৰণ কৰি ব্ৰঞ্জৰ পদকতে সন্তুষ্ট থাকিবলগীয়া হয়।
উল্লেখ্য যে ভাৰতে এটা সোণ, চাৰিটা ৰূপ আৰু চাৰিটা ব্ৰঞ্জৰ পদকেৰে প্ৰতিযোগিতাৰ সামৰণি মাৰে।