এন আৰ চিত ভুৱা নথি দাখিলৰ অভিযোগত নলবাৰীত শিক্ষানুষ্ঠানৰ কৰ্মচাৰীসহ দুজনক গ্ৰেপ্তাৰ
এন আৰ চিত নাম অন্তৰ্ভুক্তিৰ বাবে ভুৱা তথ্যপাতি আৰু নথি দাখিল কৰাৰ অভিযোগত নলবাৰীত দুজন লোকক আৰক্ষীয়ে গ্ৰেপ্তাৰ কৰে। লোক দুজন হৈছে নলবাৰীৰ ব্যক্তিগত খণ্ডৰ বিদ্যালয়ত নালন্দা পাব্লিক স্কুলৰ কৰ্মচাৰী পান্না জৈন আৰু বৰমাৰ গড়ভিতৰৰ জব্বৰ আলী। জালিয়াতিৰ অভিযোগত দুয়োকে নলবাৰী আৰক্ষীয়ে গ্ৰেপ্তাৰ কৰি জেইললৈ প্ৰেৰণ কৰিছে।
জানিৰ পৰা মতে, নালন্দা পাব্লিক স্কুলৰ পান্না জৈন নামৰ কেৰাণীজনে এটি শিশুৰ জন্মৰ ভুৱা প্ৰমাণপত্ৰ প্ৰস্তুত কৰি যোগান ধৰিছিল। আৰু এইখন সংশ্লিষ্ট শিশুটোৰ বিপৰীতে এন আৰ চিত নথি হিচাপে দিয়া হৈছিল। কিন্তু বংশবৃক্ষৰ পুনৰীক্ষণৰ সময়ত উক্ত জন্মৰ প্ৰমাণপত্ৰ ভুৱা বুলি প্ৰমাণিত হয়। ভুৱা প্ৰমাণপত্ৰ যোগান ধৰাৰ অভিযোগত নলবাৰী আৰক্ষীয়ে তেওঁক ৪ জুনত গ্ৰেপ্তাৰ কৰে।
আনহাতে, বৰমাৰ গড়ভিতৰৰ জব্বৰ আলী নামৰ লোকজনৰ বিৰুদ্ধেও ভুৱা নথি যোগান ধৰাৰ অভিযোগ উঠে। তাৰ ভিত্তিত আলীক নলবাৰী আৰক্ষীয়ে গ্ৰেপ্তাৰ কৰে।
তদন্ত চলোৱাৰ অন্তত দুয়োজনৰ বিৰুদ্ধে উঠা অভিযোগ সঁচা বুলি আৰক্ষী নিশ্চিত হয়। ৫ জুনত দুইজন অভিযুক্তক নলবাৰী আদালতত হাজিৰ কৰোৱাত আদালতে দুয়োকে নলবাৰী জিলা কাৰাগাৰলৈ প্ৰেৰণ কৰিছে।