এন আৰ চিত জালিয়াতিৰে নাম অন্তৰ্ভুক্ত কৰিবলৈ গৈ হোজাইত কালি অৰ্থাৎ বুধবাৰে এজন ব্যক্তি আৰক্ষীৰ জালত পৰে। ধৃত ব্যক্তিজন আবু তাহেৰ বুলি জানিব পৰা গৈছে।
প্ৰাপ্ত তথ্য মতে ধৃত আবু তাহেৰে শহুৰেকৰ লিগেচিৰ জৰিয়তে এন আৰ চিত নিজৰ নাম অন্তৰ্ভুক্ত কৰিবলৈ আবেদন জনাইছিল। সেইমতে কালি হোজাই থানাৰ অন্তৰ্গত শিলিগুৰি বস্তিৰ এন আৰ চি সেৱা কেন্দ্ৰত বংশ বৃক্ষ পুনৰীক্ষণৰ সময়ত লোকজনে তথ্য জালিয়াতি কৰাৰ ঘটনা পোহৰলৈ আহে।
ইয়াৰ পিছতে সেৱা কেন্দ্ৰটোৰ বিষয়াই আৰক্ষীক অৱগত কৰাত আৰক্ষীৰ এটা দল ঘটনাস্থলীলৈ গৈ লোকজনক আটক কৰি থানালৈ আনে।
সম্প্ৰতি হোজাই আৰক্ষীৰ জিম্মাত থকা ধৃত তাহেৰৰ বিৰুদ্ধে হোজাই থানাৰ সীমান্ত শাখাৰ আৰক্ষীয়ে নিজাববীয়াকৈ এটা গোচৰ ৰুজু কৰি সোধা-পোছা অব্যাহত ৰাখিছে।
জানিব পৰা মতে আৰক্ষীয়ে আজি লোকজনক আদালতত হাজিৰ কৰাই পিছত জে’ললৈ প্ৰেৰণ কৰিব।
