এইবাৰ অসমৰ এন আৰ চি সম্পৰ্কত নিজৰ প্ৰতিক্ৰিয়া প্ৰকাশ কৰিছে বিজেপিৰ মিত্ৰদল শিৱসেনাই। দলটোৰ মুৰব্বী উদ্ধৱ থাকৰেই এন আৰ চিৰ বাবে ভাৰত চৰকাৰক ধন্যবাদ জ্ঞাপন কৰাৰ লগতে অবৈধ অনুপ্ৰৱেশকাৰীৰ বিৰুদ্ধে চৰকাৰে গ্ৰহণ কৰা ব্যৱস্থাক দেশপ্ৰেমমূলক কাৰ্য বুলি অভিহিত কৰিছে।
উদ্ধৱ থাকৰেৰ নেতৃত্বৰ শিৱসেনাৰ মুখপাত্ৰ ‘সামনা’ত দলটোৱে এন আৰ চি প্ৰসংগত চৰকাৰক সমৰ্থন জনোৱাৰ লগতে কেইবাটাও তাৎপৰ্যপূৰ্ণ মন্তব্য কৰিছে। শিৱসেনাৰ মতে অসমৰ পৰা ৪০ লাখ অবৈধ অনুপ্ৰৱেশকাৰীক খেদি পঠিয়াবলৈ বিজেপিয়ে কষ্টসাধ্য প্ৰয়াস কৰিছে।
শিৱসেনাই অবৈধ অনুপ্ৰৱেশকাৰী বাংলাদেশ, শ্ৰীলংকা, পাকিস্তান আৰু ম্যানমাৰৰ ৰহিংগিয়া মুছলমান যিয়েই নহওক লাগিলে সকলোকে ভাৰতৰ পৰা খেদি দিব লাগে বুলি মন্তব্য কৰিছে।
‘সামনা’ৰ সম্পাদকীয় দলটোৱে লগতে শংকা প্ৰকাশ কৰিছে যে অনুপ্ৰৱেশকাৰীৰ বাবে অসমত এতিয়া বিদেশী খেদাৰ যি প্ৰক্ৰিয়া আৰম্ভ হৈছে সেয়া যদি কাশ্মীৰতো হয় তেতিয়াহ’লে সমগ্ৰ দেশৰ জনতাই তেওঁলোকৰ ঘৰত গেৰুৱা পতাকা উত্তোলন কৰিব। পাকিস্তানৰ পৰা অহা ভাবুকিৰ পৰিপ্ৰেক্ষিতত কাশ্মীৰতো অসমৰ দৰে ব্যৱস্থাগ্ৰহণ কৰিব লাগে বুলি উদ্ধৱ থাকৰেই মন্তব্য কৰিছে।
শিৱসেনাৰ মুৰব্বী উদ্ধৱ থাকৰেই লগতে উল্লেখ কৰিছে যে অসমত বাস কৰি থকা ৪০ লাখ অবৈধ বাংলাদেশীয়ে ৰাজ্যখনৰ ভৌগলিক, ঐতিহাসিক আৰু সাংস্কৃতিক প্ৰতিচ্ছবি সলনি কৰি পেলাইছে। থাকৰেই অসমৰ জলন্ত সমস্যা ৰূপে চিহ্নিত অবৈধ বাংলাদেশী অনুপ্ৰৱেশকাৰীৰ সমস্যাটোক গুৰুত্ব দিয়াৰ বাবে প্ৰধানমন্ত্ৰী মোদীকো ধন্যবাদ জ্ঞাপন কৰে।
নাগৰিকত্ব সংশোধনী বিধেয়কৰ বিৰুদ্ধে অসমৰ সৈতে একে স্থিতি গ্ৰহণ কৰা শিৱসেনাই এন আৰ চি প্ৰসংগতো অসমৰ সপক্ষে কৰা মন্তব্যই আঞ্চলিকতাবাদী ৰাজনীতিৰ যথাৰ্থতাকে প্ৰতিপন্ন কৰিছে।
