নেপালৰ অশান্ত পৰিস্থিতিৰ বাবে কাঠমাণ্ডু বিমানবন্দৰত আবদ্ধ হৈ আছে ৪০০ৰো অধিক ভাৰতীয় নাগৰিক। এইবাৰ ভাৰতে তেওঁলোকক নিজৰ দেশলৈ ঘূৰাই অনাৰ বাবে বিশেষ বিমানৰ ব্যৱস্থা কৰিবলৈ ওলাইছে। প্ৰতিকূল পৰিস্থিতিতো যাতে দ্ৰুত আৰু সুকলমে ঘূৰাই দিব পৰা যায় তাৰ বাবে দিল্লী আৰু কাঠমাণ্ডুৰ মাজত প্ৰচেষ্টা আৰম্ভ হৈছে।
সূত্ৰ অনুসৰি ভাৰতীয় বায়ুসেনাৰ এখন বিমান প্ৰেৰণৰ পৰিকল্পনা কৰা হৈছে। ইয়াৰ বাবে কাঠমাণ্ডুত থকা ভাৰতীয় দূতাবাসৰ বিষয়াসকলে নেপালী সেনাৰ সৈতে সমন্বয়ত কাম কৰি আছে। যাত্ৰীসকলৰ লজিষ্টিক আৰু সুৰক্ষা নিশ্চিত কৰাটোৱেই হৈছে এই মুহূৰ্তত মূল লক্ষ্য।
সমগ্ৰ পৰিস্থিতিৰ ওপৰত তীক্ষ্ণ দৃষ্টি ৰখা হৈছে বুলি বৈদেশিক পৰিক্ৰমা মন্ত্ৰালয়ে জানিবলৈ দিয়ে। ভাৰতীয় দূতাবাসৰ সৈতে নিয়মীয়াকৈ যোগাযোগ ৰাখি আৱদ্ধ নাগৰিকসকলক ক্ষিপ্ৰতাৰে ঘূৰাই অনাৰ ব্যৱস্থা কৰা হ’ব। ইতিমধ্যে দুয়োখন দেশে যৌথভাৱে এই পৰিকল্পনা আগবঢ়াই নিছে।
ইফালে সমগ্ৰ দেশ কাৰ্যতঃ সেনাৰ নিয়ন্ত্ৰণলৈ আহিছে। পৰিস্থিতি নিয়ন্ত্ৰণৰ বাবে সমগ্ৰ দেশতে সান্ধ্য আইন জাৰি কৰিছে সেনাই।
সোমবাৰে পুৱাৰে পৰা বহু ভাৰতীয়ই আতংকিত হৈ সীমান্ত পাৰ হৈ ঘৰলৈ উভতি আহিছে। নেপাল অভিমুখে কাকাৰবিটা আৰু বিৰাটনগৰ সীমান্তত প্ৰতিবাদকাৰীয়ে পথ অৱৰোধ কৰি যান-বাহন জ্বলাই দিয়াৰ ফলত নিৰাপত্তাজনিত কাৰণত সাময়িকভাৱে মালবাহী গাড়ীৰ চলাচল বন্ধ কৰি দিয়া হৈছে।
বুধবাৰে এডিজি (কাউণ্টাৰ ইনছাৰ্জেন্সি ফৰ্চ) অজয় নন্দ, ডিআইজি (এছএছবি) মনজিৎ সিং আৰু দাৰ্জিলিং জিলাৰ আৰক্ষী অধীক্ষক প্ৰবীণ প্ৰকাশে পৰিস্থিতি পুনৰীক্ষণৰ বাবে সীমান্তত উপস্থিত হয়। সমগ্ৰ পৰিস্থিতিৰ ওপৰত নজৰ ৰাখিছে উত্তৰ বংগৰ আই জি ৰাজেশ কুমাৰ যাদৱে।
সাম্প্ৰতিক পৰিস্থিতি সন্দৰ্ভত এডিজিয়ে সংবাদ মাধ্যমৰ আগত কয় যে নেপালত এতিয়াও কিমান ভাৰতীয় আবদ্ধ হৈ আছে সেই সম্পৰ্কে তেওঁলোকৰ হাতত কোনো কঠিন তথ্য নাই। সংখ্যাটো ৩০০ বা তাতকৈ অধিক হ’ব পাৰে। অৱশ্যে বেছিভাগৰে সৈতে তেওঁলোকৰ যোগাযোগ আছে। তেওঁলোকে আশা কৰিছে যে অতি সোনকালে নেপালৰ পৰিস্থিতি শান্ত আৰু স্বাভাৱিক হ’ব। তেতিয়া আলোচনাৰ অন্তত আৱদ্ধ ভাৰতীয়সকলক ঘূৰাই অনা সম্ভৱ হ’ব।
