ৰাষ্ট্ৰীয় নাগৰিক পঞ্জীৰ প্ৰথমখন খচৰা প্ৰকাশ পাবলৈ মাজত মাথো পাঁচ দিন সময় আছে। অসমবাসীৰ উৎকন্ঠাৰ অন্ত পৰিব ৩১ ডিচেম্বৰৰ মাজ নিশা প্ৰকাশ পাব লগা এন আৰ চিৰ প্ৰথমখন খচৰাৰ প্ৰকাশৰ পিছত। উল্লেখযোগ্য যে প্ৰথমখন খচৰা চাৰিটা ৱেবছাইটত উপলদ্ধ হ’ব বুলি কৰ্তৃপক্ষই জনাইছে। ৱেবছাইকেইটা হ’ল : www.nrcassam.nic.in, www.assam.mygov.in, www.assam.gov.in আৰু www.homeandpolitical.assam.gov.in ৰাইজে প্ৰথমখন খচৰা প্ৰকাশ পোৱাৰ পিছতে নিজৰ নাম এন আৰ চিত আছে নে নাই তাক জানিবলৈ এই চাৰিটা ৱেবছাইট ব্যৱহাৰ কৰিব পাৰিব।
এন আৰ চি কৰ্তৃপক্ষই জানিবলৈ দিয়া অনুসৰি যদিহে প্ৰথম খচৰাত কোনো লোকৰ নাম সন্নিৱিষ্ট নহয় তেন্তে তেওঁলোকৰ নাম সম্পূৰ্ণ খচৰাত প্ৰকাশ পাব আৰু এই সন্দৰ্ভত পৰীক্ষা-নিৰীক্ষা অব্যাহত আছে। ইয়াৰ উপৰি কোনো পৰিয়ালৰ সদস্যৰ নাম আংশিকভাৱে প্ৰকাশিত খচৰাত নাথাকিব পাৰে। কিন্তু পৰৱৰ্তী সময়ত সম্পূৰ্ণকৈ প্ৰকাশ পাবলগীয়া খচৰাৰ পৰা অন্তৰ্ভুক্তিৰ বিষয়ে জানিব পাৰিব। অৱশ্যে এতিয়ালৈ সম্পূৰ্ণকৈ প্ৰকাশিত খচৰাৰ তাৰিখ জনোৱা হোৱা নাই।
আনহাতে এন আৰ চি আবেদনকাৰী সকলে সম্পূৰ্ণকৈ প্ৰকাশিত খচৰাৰ ভিত্তিতহে দাবী আৰু আপত্তি দৰ্শাব পাৰিব। এই দাবী-আপত্তি সমূহ নিষ্পত্তি কৰাৰ পিছতহে চূড়ান্ত এন আৰ চি প্ৰকাশ পাব। চূড়ান্তভাবে এন আৰ চি প্ৰকাশ পোৱাৰ পিছতহে আবেদনকাৰী সকলে বিদেশী ন্যায়াধিকৰণত আপীল কৰিব পাৰিব বুলি কৰ্তৃপক্ষই জনায়।
লক্ষণীয় যে এই সমগ্ৰ প্ৰক্ৰিয়াটো মাননীয় উচ্চতম ন্যায়ালয়ৰ প্ৰত্যক্ষ তত্বাৱধানত অত্যন্ত স্বচ্ছভাবে ৰূপায়ন কৰা হৈছে বুলি জনায়।
এক ৰাজহুৱা ঘোষণাৰ জৰিয়তে জনায় যে এন আৰ চি উন্নীতকৰণৰ কামত অসম চুক্তি মৰ্মে ১৯৭১ চনৰ ২৪ মাৰ্চ (মাজ নিশা)ৰ সময়সীমাকে ভিত্তি বৰ্ষ হিচাপে ধৰা হৈছে।
