ওদালগুৰি আৰক্ষীয়ে এক অভিযান চলাই শনিবাৰে নিশা ওদালগুৰিৰ লালপুল আৰক্ষী চকীৰ অধীনৰ লালপুল অঞ্চলত এখন খালী চিলিণ্ডাৰ কঢ়িয়াই অনা ট্ৰাকত বৃহৎ পৰিমানৰ গাঁজা জব্দ কৰে।
আৰক্ষী সূত্ৰৰ মতে জিলাখনৰ ১৫ নং ৰাষ্ট্ৰীয় ঘাইপথেৰে সৰবৰাহকাৰীৰ যাতায়তৰ তথ্য লাভ কৰি আৰক্ষীয়ে তৎপৰতাৰে AS-25-AC-9489 নম্বৰৰ ট্ৰাকখন ধৰা পেলায়।
আৰক্ষীয়ে পুংখানুপুংখভাৱে তালাচী চলাই প্লাষ্টিকৰ বেগত বান্ধি অনা ৭৫ কিলোগ্ৰাম পৰিমানৰ সন্দেহযুক্ত গাঁজা উদ্ধাৰ কৰে।
ইয়াৰ মাজতে এই ঘটনাৰ লগত জড়িত চাৰিজন লোকক আৰক্ষীয়ে আটক কৰে।
ধৃত লোক কেইজনক ওদালগুৰিৰ লাংদাংপাৰাৰ ডিবছন বাগলাৰীৰ পুত্ৰ ৰিপন বাগলাৰী (২৬), ওদালগুৰিৰ ওৰাং আৰক্ষী থানাৰ অন্তৰ্গত নিচলামাৰীৰ বাসিন্দা সুবন বড়োৰ পুত্ৰ বীৰু বড়ো(১৮), ওদালগুৰিৰ ওৰাং আৰক্ষী থানাৰ অন্তৰ্গত কাঠপুৰীৰ বাসিন্দা ৰেবেন গয়াৰীৰ পুত্ৰ ৰনছাই গয়াৰী (২৬) আৰু ওদালগুৰিৰ ওৰাং আৰক্ষী থানাৰ অন্তৰ্গত কাঠপুৰীৰ বাসিন্দা খগেন দৈমাৰীৰ পুত্ৰ অৰবিন দৈমাৰী(২৪) বুলি চিনাক্ত কৰা হৈছে।
আৰক্ষীয়ে জনায় যে এই নিচাযুক্ত দ্ৰব্যখিনি অৰুণাচল প্ৰদেশৰ কালাকটাঙৰ পৰা অনা হৈছিল।
অৰুণাচল প্ৰদেশত ব্যৱসায়িক উদ্দেশ্যত গাঁজাৰ খেতি কৰাটো এতিয়া এটা নতুন ধাৰা হিচাপে উত্থান ঘটিছে।
ওদালগুৰি জিলাখন অবৈধ নিচাযুক্ত সামগ্ৰী সৰবৰাহৰ এক কেন্দ্ৰ হৈ পৰিছে।
