ওদালগুৰিত সোপাধৰাৰ সন্দেহত ৰাইজৰ নিৰ্মম প্ৰহাৰ : মৃত্যুৰে যুঁজিছে আহত ৭জনকৈ লোকে
ৰাজ্যখনৰ চৰাইদেউ, বিশ্বনাথ, তিতাবৰকে ধৰি বিভিন্ন অঞ্চলত সোপাধৰাৰ আতংকই সন্ত্ৰাস সৃষ্টি কৰাৰ সময়তে আজি ওদালগুৰি জিলাত স্থানীয় ৰাইজৰ হাতত ৭ জনকৈ লোকক প্ৰহৃত হৈ মৃত্যুৰে যুঁজি থকা ঘটনাই অঞ্চলটোত ব্যাপক চাঞ্চল্যৰ সৃষ্টি কৰিছে।
উল্লেখযোগ্য যে ওদালগুৰি জিলাৰ ডিমাকুছি থানাৰ অন্তৰ্গত ৰজাগড়, বৰঙাজুলি আৰু শুক্লাইত আজি পুৱা একাংশ লোকে অঞ্চলটোত প্ৰৱেশ কৰি অঞ্চলটোৰ বিভিন্ন লোকৰ ঘৰত গৈ নানা ধৰণৰ অলৌকিক কথাৰে ভীতিগ্ৰস্ত কৰি তোলে।
আনহাতে স্থানীয় একাংশ সচেতন লোকে অঞ্চলটোত প্ৰৱেশ কৰা অচিনাক্ত লোক কেইজনক আবদ্ধ কৰি সোধ-পোছ কৰে যদিও লোক কেইজনে কোনো উত্তৰ দিব নোৱাৰাত স্থানীয় ৰাইজে লোক কেইজনক প্ৰহাৰ কৰিবলৈ ধৰে। স্থানীয় ৰাইজে লোক কেইজনক ইমানেই প্ৰহাৰ কৰে যে লোকে কেইজনৰ অৱস্থা বৰ্তমান সংকটজনক বুলি জানিব পৰা গৈছে।
তাৰোপৰি উত্তেজিত ৰাইজে ব্যক্তিকেইজনে ব্যৱহাৰ কৰা এ এছ ০২ টি ২৭৯০ নম্বৰৰ এখন এখন পালচাৰ বাইকো জ্বলাই দিয়ে।
অৱশ্যে পিছত ঘটনাস্থলীত আৰক্ষীলোক উপস্থিত হৈ স্থানীয় ৰাইজৰ প্ৰহাৰত মৃতপ্ৰায় হৈ পৰা অচিনাক্ত লোক কেইজনকে উদ্ধাৰ কৰি চিকিত্সালয়লৈ প্ৰেৰণ কৰে।