টংলা আৰু হৰিশিঙা ষ্টেশ্যনৰ মাজত ৪৫-৪৬ কিলোমিটাৰ দূৰত্বৰ টংলা মহাবিদ্যালয়ৰ ওচৰৰ চমুৱাপাৰা-পানেৰী পথত এটা ৰখীয়াবিহীন ৰে’লৱে ক্ৰছিং গেট স্থাপনৰ দাবীত এক নাটকীয় প্ৰতিবাদ সাব্যস্ত কৰে স্থানীয় ৰাইজে।
গাওঁবাসী আৰু ছাত্ৰসকলে তেওঁলোকৰ দাবী সাব্যস্ত কৰিবলৈ উজনিমুৱা ৰঙিয়া-ডেকাৰগাঁৱ ৫৫৮৬১ নং যাত্ৰীবাহী ৰে’লখন শুকুৰবাৰে দুপৰীয়া অৱৰোধ কৰি ৰখাই দিয়ে।
অধিকাংশ মহিলা আৰু স্কুলীয়া ছাত্ৰৰে সৈতে গাওঁবাসীয়ে ৰে’লপথত অৱস্থান কৰি প্ৰায় ১-৩০ মান বজাত ৰে’লখন ৰখাই দিয়ে আৰু পাঁচ মিনিটৰ বাবে আবদ্ধ কৰি ৰাখে।
ঘটনাস্থলীত জিআৰপিৰ জোৱান আৰু স্থানীয় আৰক্ষী আহি উপস্থিত হোৱাৰ আগেয়ে গাওঁবাসী তাৰ পৰা আঁতৰি যায়।
গাওঁবাসীৰ লগতে বিদ্যালয় তথা মহাবিদ্যালয়লৈ যোৱা ছাত্ৰ-ছাত্ৰীসকলে অঞ্চলটোত এখন ক্ৰ’ছিং গেট নোহোৱাৰ বাবে বিপদশংকুল পৰিস্থিতিৰ সন্মুখীন হৈ আহিছে।
গাওঁবাসীয়ে আনকি এখন দাবী সমিতিও গঠন কৰিছে আৰু উত্তৰ-পূব সীমান্ত ৰে’লৱেৰ ৰঙিয়া সংমণ্ডলৰ মাণ্ডলিক ৰে’ল প্ৰৱন্ধক, উত্তৰ-পূব সীমান্ত ৰে’লৱেৰ মহা প্ৰৱন্ধক আৰু ওদালগুৰি জিলাৰ উপায়ুক্তলৈ কেইবাখনো স্মাৰক পত্ৰ প্ৰদান কৰিছে যদিও কোনো ইতিবাচক সঁহাৰি লাভ কৰা নাই।
অঞ্চলটোৰ ৰাজ্যসভাৰ সাংসদ শান্তিয়াজ কুজুৰেও বিদ্যালয় আৰু মহাবিদ্যালয়ৰ ছাত্ৰ-ছাত্ৰীসকলৰ লগতে যাতায়ত কৰা গাওঁবাসীৰ সুৰক্ষাৰ দিশটোৰ কথা চিন্তা কৰি উত্থাপন কৰা দাবী সম্পৰ্কে কেন্দ্ৰীয় ৰে’ল মন্ত্ৰালয়লৈ পত্ৰ লিখিছিল।
