চৰকাৰৰ দ্বাৰা পৰিচালিত ভিক্ষাৰীসকলৰ আবাস কেৱল দান-বৰঙণি নহয়, চৰকাৰে সংবিধানৰ মূল্যবোধ মানি চলিব লাগিব বুলি মত পোষণ কৰিছে উচ্চতম ন্যায়ালয়ে। শুকুৰবাৰে ন্যায়াধীশ জে বি পাৰ্দিৱালা আৰু আৰ মহাদেৱানৰ বিচাৰপীঠে এই ৰায়দানৰ জড়িয়তে সকলো ৰাজ্য আৰু কেন্দ্ৰীয় শাসিত অঞ্চলক ছমাহৰ ভিতৰত এই ঘৰসমূহত উন্নত জীৱন-যাপন নিশ্চিত কৰিবলৈ নিৰ্দেশ দিছে। আদালতে কয় যে এই আবাসত থকা লোকসকলেও আন সকলোৰে দৰে মৰ্যাদাৰে জীয়াই থকাৰ অধিকাৰ আছে, কাৰণ বহুতেই অপৰাধী হোৱাৰ বাবে নহয়, দৰিদ্ৰতা, মানসিক ৰোগ বা অন্যান্য কষ্টৰ বাবেহে এই ঘৰত থাকিবলৈ।
উল্লেখ্য যে ২০০০ চনত দিল্লীৰ এখন চৰকাৰী ভিক্ষাৰী অবাসত বেয়া পানীৰ বাবে কলেৰাৰ দৰে গুৰুতৰ ৰোগৰ সৃষ্টি কৰিছিল, যাৰ ফলত বহু লোকৰ মৃত্যু হোৱাৰ বাবে গোচৰৰ তৰিছল। উক্ত গোচৰৰ শুনানিত এই ৰায়দান দিয়া হৈছে। আদালতে কয় যে এই ঘৰবোৰত বিশুদ্ধ পানী, উপযুক্ত শৌচাগাৰ, ভাল স্বাস্থ্যসেৱা প্ৰদান নকৰাটো কেৱল দুৰ্বল ব্যৱস্থাপনাই নহয়, মৰ্যাদাপূৰ্ণ জীৱনৰ সাংবিধানিক অধিকাৰো ভংগ কৰে। কয়দীসকলৰো মৰ্যাদাপূৰ্ণ জীৱন যাপন কৰাৰ অধিকাৰ আছে, গতিকে এই চৰকাৰী ভিক্ষাৰীৰ ঘৰত থকা লোকসকল, যিসকল অপৰাধী নহয়, তেওঁলোকো একে সন্মান আৰু যত্নৰ যোগ্য বুলি আদলতে মত পোষণ কৰিছে।
পৰিস্থিতি উন্নত কৰিবলৈ আদালতে, ৰাজ্যসমূহক এই ভিক্ষাৰীৰ ঘৰত প্ৰৱেশ কৰা পিছত ২৪ ঘণ্টাৰ ভিতৰত চিকিৎসা পৰীক্ষা, মাহেকীয়া স্বাস্থ্য পৰীক্ষা, বিশুদ্ধ খোৱাপানী, কাৰ্যক্ষম শৌচাগাৰ, আৰু কীট-পতংগ নিয়ন্ত্ৰণৰ ব্যৱস্থা কৰিবলৈ নিৰ্দেশ দিয়ে। লগতে কোৱা হৈছে যে ভিক্ষা কৰি থাকোতে উদ্ধাৰ কৰা শিশুক ভিক্ষাৰীৰ ঘৰলৈ নহয়, শিশু কল্যাণ গৃহলৈ নিবলৈনিৰ্দেশ প্ৰদান কৰিছে। এই ঘৰসমূহত থকা লোকসকলৰ উন্নত ব্যৱস্থা নিশ্চিত কৰিবলৈ সামাজিক ন্যায় আৰু সৱলীকৰণ মন্ত্ৰালয়ে তিনি মাহৰ ভিতৰত এই আদেশৰ ভিত্তিত নিৰ্দেশনা জাৰি কৰি কাৰ্যকৰী কৰিবলৈ নিৰ্দেশ দিছে।
