আজি শ্বিলঙস্থিত ৰাজভৱনত কনৰাড চাংমাৰ নেতৃত্বত নৱ গঠিত মিত্ৰজোঁটৰ মেঘালয় মন্ত্ৰীসভাৰ শপত গ্ৰহণ অনুষ্ঠানত উপস্থিত থাকি অসমৰ মুখ্য মন্ত্ৰী সৰ্বানন্দ সোণোৱালে ৰাজ্যখনৰ নতুন মন্ত্ৰী সভাৰ সদস্য সকলক অভিনন্দন জ্ঞাপন কৰে।
মুখ্য মন্ত্ৰীয়ে আশা প্ৰকাশ কৰে যে কনৰাড চাংমাৰ নেতৃত্বত গঠিত মন্ত্ৰী সভাই মেঘালয়ৰ জনসাধাৰণৰ আশা-আকাংক্ষা সমূহ পূৰণৰ বাবে সৰ্বতোপ্ৰকাৰৰ পদক্ষেপ গ্ৰহণ কৰিব।
ইয়াৰ উপৰি তেওঁ মেঘালয়ৰ সৰ্বাংগীন বিকাশৰ বাবে নৱ গঠিত মন্ত্ৰী সভাই দৃঢ়তাৰ নীতি, আঁচনি গ্ৰহণ কৰি উন্নয়নৰ প্ৰক্ৰিয়াত এক নতুন গতি প্ৰদান কৰিব বুলিও আশা প্ৰকাশ কৰে।
আজি অনুষ্ঠিত হোৱা শপত গ্ৰহণ অনুষ্ঠানত কেন্দ্ৰীয় গৃহমন্ত্ৰী ৰাজনাথ সিং তথা বিজেপিৰ ৰাষ্ট্ৰীয় সভাপতি অমিত শ্বাহো উপস্থিত আছিল।
লোকসভাৰ প্ৰাক্তন অধ্যক্ষ পিএ চাংমাৰ পুত্ৰ তথা এনপিপিৰ মুৰব্বী কনৰাড চাংমাই ৩৪ গৰাকী বিধায়কৰ সমৰ্থনেৰে পাহাৰীয়া ৰাজ্যখনত চৰকাৰ গঠনৰ বাবে ৰাজ্যপাল গংগা প্ৰসাদক সাক্ষাৎ কৰিছিল।
উল্লেখযোগ্য যে সদ্য-সমাপ্ত নিৰ্বাচনটোত কংগ্ৰেছে ২১খন আসনেৰে একক সংখ্যাগৰিষ্ঠ দল হিচাপে স্বীকৃত হৈছিল যদিও কনৰাড নেতৃত্বাধীন এনপিপিয়ে বিজেপিকে আদি কৰি অন্যান্য মিত্ৰ দলৰ সহযোগত চৰকাৰ গঠন কৰিবলৈ সক্ষম হয়।
