কলিয়াবৰৰ বৰঘুলী শিলঘাট- ধিং মথাউৰি নিৰ্মাণত ব্যাপক দুৰ্নীতিৰ অভিযোগ
বাৰিষা সমাগত, কিন্তু এতিয়াও সম্পূৰ্ণ হৈ উঠা নাই ৰাজ্যৰ বহু মথাউৰিৰ মেৰামতিৰ কাম। বিপদসংকুল পৰিস্থিতিৰ মাজত দিন অতিবাহিত কৰিছে নৈপৰীয়া বাসিন্দাসকলে। এপিনে পদুলিমুখত বাৰিষা, আনহাতে মথাউৰি নিৰ্মাণত ঠিকাদাৰে দুৰ্নীতি-অনিয়ম সংঘটিত কৰাৰ অভিযোগ।
ৰাজ্যৰ আন ঠাইৰ মথাউৰিৰ কথাটো বাদেই, খোদ জলসম্পদ মন্ত্ৰীৰ গৃহসমষ্টিতে সম্পুৰ্ণ হোৱা নাই মথাউৰি মেৰামতিৰ পুনৰ্নিৰ্মাণৰ কাম।
হাতীমুৰাৰ পিচত কলিয়াবৰৰ বৰঘুলীত মথাউৰি মেৰামতিত ব্যৱহাৰ কৰা হৈছে নিম্ন মানৰ সা-সামগ্ৰী। বৃহত্তৰ অঞ্চলক ব্ৰহ্মপুত্ৰ বানৰ পৰা ৰক্ষা কৰিবলৈ অব্যাহত থকা শিলঘাট-ধিং মথাউৰি মেৰামতিত ব্যৱহাৰ কৰা হৈছে নৈৰ বালিমাটি। অঞ্চলটোত চলি থকা ১৮৮৮ মিটাৰ দৈৰ্ঘ্যৰ মথাউৰি মেৰামতিত ঠিকাদাৰে আলতীয়া মাটিৰ বিপৰীতে ব্যৱহাৰ কৰিছে নৈ-কাষৰীয়া বালিয়া মাটি। বিভাগীয় নীতি-নিৰ্দেশনা অমান্য কৰি ঠিকাদাৰে চলাই গৈছে মথাউৰি মেৰামতিৰ কাম।
জলসম্পদ বিভাগৰ দ্বাৰা নিৰ্ধাৰিত বহল আৰু উচ্চতা অনুসৰি হোৱা নাই মথাউৰিৰ পুনঃনিৰ্মাণৰ কাম-কাজ। মুঠৰ ওপৰত ৰাইজৰ সমস্যাক আওকাণ কৰি এতিয়া মুনাফা লুটাত ব্যস্ত ঠিকাদাৰসকল। ইপিনে কুম্ভকৰ্ণ নিদ্ৰাত ৰাজ্যৰ জলসম্পদ বিভাগ।
বিগত বৰ্ষত ব্ৰহ্মপুত্ৰৰ প্ৰলয়ংকাৰী বানত বিস্তৰ ক্ষতি হোৱা কলিয়াবৰৰ বৰঘুলী অঞ্চলক বানৰ পৰা ৰক্ষা কৰাৰ উদ্দেশ্যে তিনি কোটি টকা ব্যয়ৰে মথাউৰি মেৰামতিৰ কাম অব্যাহত ৰাখিছে জলসম্পদ বিভাগে। কিন্তু , ঠিকাদাৰপক্ষৰ নিম্মমানৰ কাম-কাজে শংকিত কৰিছে অঞ্চলবাসীক,হয়তো নিম্নমানৰ এই মথাউৰিৰ বাবে পুনৰ বানত ককবকাব লাগিব বৃহত্তৰ বৰঘুলী অঞ্চলৰ বাসিন্দাই।
আনহাতে, বিহডুবি গাখীৰখাইতি গাঁৱত নিৰ্মাণ কৰি থকা বান্ধটো কলিয়াবৰ মহকুমাৰ ভাৰপ্ৰাপ্ত অতিৰিক্ত উপায়ুক্ত গৰাকীয়ে পৰিদৰ্শন কৰাৰ পিছত বন্ধ কৰাৰ নিৰ্দেশ দিছে। নিৰ্মাণত ব্যৱহাৰ কৰা নিম্ন মানৰ মাটিৰ বাবে বাৰিষা বানপানীৰ সময়ত বান্ধ ভাগি পৰাৰ আশংকা প্ৰকাশ কৰি বিষয়াগৰাকীয়ে বান্ধটোৰ কাম বন্ধ কৰাৰ নিৰ্দেশ দিছে।
এইক্ষেত্ৰত ঠিকাদাৰ কেইজনে সেই স্থানত বান্ধৰ কাম আৰম্ভ কৰিলে আইনী ব্যৱস্থা গ্ৰহণ কৰাৰ কথা উল্লেখ কৰি অতিৰিক্ত উপায়ুক্ত গৰাকীয়ে কলিয়াবৰ- উলুৱনি থানাৰ ভাৰপ্ৰাপ্ত বিষয়াক নিৰ্দেশ দিছে।