সোমবাৰে বিয়লি কলিয়াবৰ বিধানসভা সমষ্টিৰ অন্তৰ্গত কলিয়াবৰৰ শালনা চাহ বাগিচাৰ মজদুৰ সংঘৰ কাৰ্যালয় প্ৰাংগণত কংগ্ৰেছৰ এখন বিশাল ৰাজহুৱা কৰ্মীসভা অনুষ্ঠিত হয়।
আগন্তুক ২০১৯ চনৰ লোকসভা নিৰ্বাচনৰ বিষয়টোৱে উক্ত কৰ্মীসভাত স্থান দখল কৰা পৰিলক্ষিত হৈছে।
আনহাতে এই কৰ্মীসভাত কলিয়াবৰ সাংসদ গৌৰৱ গগৈ, প্ৰাক্তন মন্ত্ৰী তথা কংগ্ৰেছৰ জ্যেষ্ঠ নেতা ৰকিবুল হুছেইন, ৰূপহীহাটৰ বিধায়ক নুৰুল হুদাৰ লগতে দলৰ আন আন নেতা-কৰ্মীয়ে অংশগ্ৰহণ কৰে।
উল্লেখ্য যে ২০১৯ ত অনুষ্ঠিত হ’ব লগীয়া লোকসভা নিৰ্বাচনত পুনৰবাৰ কলিয়াবৰ লোকসভা সমষ্টিৰ পৰা কংগ্ৰেছ দলৰ গৌৰৱ গগৈক পুনৰ সাংসদ হিচাপে নিৰ্বাচিত কৰিবলৈ সভাত অংশ গ্ৰহণ কৰা সমূহ ৰাইজক প্ৰাক্তন মন্ত্ৰী ৰকিবুল হুছেইনে আহ্বান জনাই।
এই সভাত সাংসদ গৌৰৱ গগৈ, আৰু নুৰুল হুদাকে প্ৰমুখ্যে কৰি কংগ্ৰেছ দলৰ বিষয় ববিয়াই ভাৰতীয় জনতা পাৰ্টী চমুকৈ বিজেপি আৰু অসম গণ পৰিষদ চমুকৈ অগপ দলক ক্ষুৰধাৰ সমালোচনা কৰে।
অগপ আৰু বিজেপি দলক প্ৰতিহত কৰি কংগ্ৰেছ দলৰ প্ৰাৰ্থীক পূৰ্ণ সমৰ্থন জনাই দেশত পুনৰ কংগ্ৰেছ দলৰ চৰকাৰ গঠনৰ বাবে মাৰ বান্ধি থিয় হবলৈ সমূহ ৰাইজক আহ্বান জনায়।
কলিয়াবৰত এনেদৰেই সোমবাৰে কংগ্ৰেছ দলে আগন্তুক ২০১৯ চনত হ’বলগা লোকসভা নিৰ্বাচনৰ বাবে এক আগতীয়া ৰণশিঙা বজোৱা পৰিলক্ষিত হ’ল।
