গেংটকস্থিত ছিকিম আৰ্চাৰি এছ’চিয়েশ্যন (এছ এ এ)ৰ খেলপথাৰত অনুষ্ঠিত ১৭ সংখ্যক মুখ্য মন্ত্ৰী স্বৰ্ণ কাপ আৰ্চাৰি টুৰ্নামেণ্টৰ ফাইনেলত কাইলৈ ছিকিমৰ ‘ছিচেই’ দলে ভুটানৰ ‘ইয়াংছে ট’ৰ্ছ এণ্ড ট্ৰেভেল’ৰ বিৰুদ্ধে অৱতীৰ্ণ হ’ব।
ছিকিম আৰ্চাৰি এছ’চিয়েশ্যনে উক্ত প্ৰতিযোগিতাখনৰ আয়োজন কৰিছে।
প্ৰতিযোগিতাখনৰ প্ৰথমখন ছেমি ফাইনেলত ছিকিমৰ ছিচেই দলে নেভী দলক পৰাস্ত কৰাৰ বিপৰীতে আনখন ছেমি ফাইনেলত ইয়াংছে ট’ৰ্ছ এণ্ড ট্ৰেভেলে গেংটকৰ গাৰুদা ব্লু দলক পৰাস্ত কৰি ফাইনেলত প্ৰৱেশ কৰে।
দেওবাৰে পুৱা ৯ বজাৰ পৰা আৰম্ভ হ’বলগীয়া ফাইনেল খেলখন উপভোগৰ বাবে ছিকিম আৰ্চাৰি এছ’চিয়েশ্যনে সকলো ক্ৰীড়া প্ৰেমী তথা সাধাৰণ লোকক আমন্ত্ৰণ জনাইছে।
উল্লেখযোগ্য যে উক্ত প্ৰতিযোগিতাখনত ছিকিম, পশ্চিম বংগ আৰু ভুটাণৰ মূঠ ১৭টা দলে অংশগ্ৰহণ কৰে। প্ৰতিযোগিতাখনৰ বিজয়ী দলক ১ লাখ টকাৰ নগদ ধন আৰু বঁটাৰে পুৰস্কৃত কৰা হ’ব তথা ৰানাৰ্ছ আপ দলক নগদ ৫০,০০০ টকা আৰু বঁটা আগবঢ়োৱা হ’ব।
