দেশৰ বিশিষ্ট সামাজিক কৰ্মী আন্না হাজাৰেই প্ৰাক্তন মুখ্যমন্ত্ৰী কালিখ’ পুলৰ মৃত্যুৰ বিষয়টোক অৱজ্ঞা কৰাৰ বাবে অৰুণাচল চৰকাৰক সমালোচনা কৰিছে।
শনিবাৰে ইটানগৰৰ ইন্দিৰা গান্ধী পাৰ্কত সমৰ্থক আৰু দুৰ্নীতিৰ বিৰুদ্ধে থিয় দিয়া সমভাৱাপন্ন লোকৰ এখন সভাত ভাষণ দি ৮০ বছৰীয়া সামাজিক কৰ্মীগৰাকীয়ে কয় যে পুলৰ মৃত্যু এক ‘’হত্যা’’ আৰু চৰকাৰে তেওঁৰ মৃত্যুৰ আঁৰৰ ৰহস্য উদ্ঘাটনৰ বাবে সঠিক তদন্ত কৰা উচিত।
হাজাৰে লগতে কয় যে তেওঁ পুলৰ মৃত্যুৰ বিষয়টো ন্যায় নোপোৱালৈকে তেওঁৰ ভৱিষ্যত সভাবোৰত তথা প্ৰতিবাদী কাৰ্যসূচীসমূহত দাঙি ধৰিব। তেওঁ কয় যে ২৩ মাৰ্চৰ পৰা দিল্লীৰ ৰামলীলা মইদানত আৰম্ভ হ’বলগীয়া দুৰ্নীতিৰ বিৰুদ্ধে গণ আন্দোলনৰ কাৰ্যসূচীত বিষয়টো সন্নিৱিষ্ট কৰা হ’ব।
ভাষণ প্ৰসংগত হাজাৰেই প্ৰধানমন্ত্ৰী নৰেন্দ্ৰ মোডীয়ে ৰাষ্ট্ৰক দিয়া মিছা প্ৰতিশ্ৰুতিৰ কথাও উল্লেখ কৰে।
লোকপাল বিধেয়কখন ৰূপায়ন প্ৰসংগত গান্ধীবাদী নেতাগৰাকীয়ে কয় যে মোডী যেতিয়া গুজৰাটৰ মুখ্যমন্ত্ৰী আছিল তেতিয়া ৰাজ্যপালগৰাকীয়ে তেওঁক লোকপাল বিধেয়কখন গৃহিত কৰাৰ কাৰণে হেচা দিছিল যদিও মোডীয়ে ইয়াৰ ৰূপায়নৰ বিৰোধিতা কৰি উচ্চ ন্যায়ালয় তথা উচ্চতম ন্যায়ালয়ত যুঁজ দিছিল।
‘’আমি মোডীৰ পৰা বহু আশা কৰিছিলো, কিন্তু তেওঁ তেওঁৰ প্ৰতিশ্ৰুতি ৰক্ষা কৰাত ব্যৰ্থ হৈছে,’’-হাজাৰে এইদৰে কয়।
হাজাৰে ৰাজ্যখনৰ যুৱ প্ৰজন্মক সকলো ধৰণৰ দুৰ্নীতিৰ বিৰুদ্ধে যুঁজ দি যাবলৈ আৰু লগতে প্ৰাক্তন মুখ্যমন্ত্ৰী কালিখ’ পুলৰ বাবে ন্যায় দাবী কৰিবলৈ আহ্বান জনায়।
