সেউজী ধৰনীত সেউজীয়া শইচৰে শোনিতপুৰ জিলাৰ বালিপৰাৰ সমীপৱৰ্তী খনামুখৰ জীয়া ভৰলী নৈৰ দাঁতিত কৃষি বিপ্লৱৰ সূচনা কৰি এক নিদৰ্শন দাঙি ধৰিছে এজন আদৰ্শ কৃষক শিবেন মিলিয়ে।
মিলিয়ে প্ৰায় ৬২ বিঘা ভূমিত কৰিছে কুঁহিয়াৰ খেতি| চৰকাৰি চাকৰিক প্ৰত্যাহবান হিচাপে লৈ নিজে এইদৰে কুঁহিয়াৰ খেতিৰে স্বাৱলম্বী হোৱাৰ উপৰি সংস্থাপন দিছে প্ৰায় ৮ জনকৈ নিৱনুৱা লোকক।
উল্লেখ্য যে শিবেন মিলিৰ এই কুঁহিয়াৰ খেতিৰ পৰাই কুঁহিয়াৰ পগাই উৎপন্ন কৰে গুৰ। আৰু এই উৎপাদিত গুৰৰ চাহিদা এতিয়া শোণিতপুৰৰ বজাৰে বজাৰে। এনেদৰেই উৎপাদিত গুৰ বজাৰত বিক্ৰী কৰি মিলিয়ে বছৰি উপাৰ্জন কৰে ১-২ লাখ টকা পৰ্যন্ত।
লক্ষ্যণীয় কথাটো হ’ল যে শিবেন মিলি এজন আদৰ্শ কৃষক হোৱাৰ বিপৰীতে কিন্তু আজিকোপতি অসম চৰকাৰৰ কৃষি বিভাগৰ পৰা লাভ কৰা নাই কোনো চৰকাৰি সা-সুবিধা তথা আৰ্থিক অনুদান।
উল্লেখ্য যে, মিলিয়ে অন্য লোকৰ পৰা কুঁহিয়াৰৰ ৰস উলিওৱা মেচিন ভাড়াত আনি চলাই গৈছে নিজ কৰ্ম।
নিবনুৱা সমস্যাই গ্ৰাস কৰা ৰাজ্যৰ প্ৰত্যেকজন নিবনুৱাৰ বাবে শোণিতপুৰৰ খনামুখৰ এইজন শিবেন মিলি সঁচাই এক আদৰ্শ।
