“আমি ৰাইজৰ লগত গণতান্ত্ৰিক প্ৰক্ৰিয়াৰে আগুৱাই যাম। জিতেন দত্তই একেটা কথাই কৈছে, আমিও একেটা কথাই কৈছো। ভাৰত চৰকাৰে যদি এই নাগৰিকত্ব সংশোধনী বিধেয়ক, ২০১৬ গৃহীত কৰে তেন্তে অসম জ্বলিব। কাৰণ অসমৰ নৱপ্ৰজন্মই ভাৰতৰ এই অবিবেচনামূলক সিদ্ধান্ত কেতিয়াও আদৰি ল’ব নোৱাৰে। নৱপ্ৰজন্মই তেতিয়া সশস্ত্ৰ পন্থালৈ, যিহেতু এতিয়াও সংযুক্ত মুক্তি বাহিনী অসম জীৱিত হৈ আছে, সেয়েহে নৱপ্ৰজন্ম সেই দিশলৈ গতি কৰিব। এই কথা আমি আটায়ে উপলব্ধি কৰিছো।”
আজি সংযুক্ত মুক্তি বাহিনী অসমৰ (আলোচনাপন্থী) কাৰ্য্যালয়ত এখন সংবাদ মেল অনুষ্ঠিত কৰি আলফাৰ সাধাৰণ সম্পাদক অনুপ চেতিয়াই এই মন্তব্য কৰে।
মেঘালয়ৰ সকলো শ্ৰেণীৰ জনসাধাৰণে এই আইনখনৰ বিৰুদ্ধে মত পোষণ কৰিছে বুলি উল্লেখ কৰি চেতিয়াই কয় যে অসমত তেওঁলোক এটা লজ্জাজনক অৱস্থাত আছে, অসমৰ কিছুসংখ্যক লোকে এই বিধেয়কখনত সন্মতি জনাইছে। তেওঁলোকৰ শুভবুদ্ধিৰ উদয় হওক বুলি আশা প্ৰকাশ কৰে চেতিয়াই। জাতিৰ স্বাৰ্থত যাতে সকলো একত্ৰিত হৈ থিয় দিয়ে তাৰ বাবে অসমবাসীলৈ আহ্বান জনায় আলফাৰ সাধাৰণ সম্পাদক অনুপ চেতিয়াই।
তেওঁৰ কয়, “অসমীয়া ভাষা-সংস্কৃতি যদি হেৰুৱাবলগীয়া হয়, তেন্তে ইতিহাসতহে থাকিব এসময়ত অসমত এটা অসমীয়া নামৰ জাতি আছিল।”
আনহাতে, ৰেৱতী ফুকন সন্ধানহীন হোৱাৰ ঘটনাত চেতিয়াই উদ্বিগ্নতা প্ৰকাশ কৰি কয়, “তেওঁৰ পৰিয়ালৰ সৈতে কথা পাতি এটা কথাই অনুমান হৈছে যে তেওঁ আত্মহত্যা কৰিব পৰাকৈ পাৰিবাৰিক বা ব্যক্তিগতভাৱে তেনেকুৱা পৰিস্থিতি সৃষ্টি হোৱা নাছিল। কোনোবাই তেওঁক ইচ্ছাকৃতভাৱেই অপহৰণ কৰি নিছে। অপহৰণ কৰা বুলি এটা কাৰণতেই সন্দেহ কৰিছো যদি তেওঁ আত্মহত্যা কৰিলেহেঁতেন নিশ্চয় তেওঁৰ মৃতদেহটোৰ সন্ধান ওলাল হেঁতেন। যিয়ে অপহৰণ নকৰক তেওঁলৈ আহ্বান জনাইছো, ৰেৱতী ফুকনক পৰিয়ালবৰ্গৰ হাতত গতাই দিয়ক।”
শান্তি আলোচনাৰ লগত থকা এন এছ চি এন(আই এম), এন এছ চি এন ৰিফৰমেচন, এন ডি এফ বি (পি), মেঘালয়ৰ খাচি, গাৰো সংগঠন, কাৰ্বি লংৰি, নৰ্থ কাছাৰ হিলচ লিবাৰেইশ্যন ফ্ৰণ্ট, আদি গোটৰ সৈতে আলোচনাত মিলিত হোৱাৰ লগতে এখন সংগ্ৰাম গঢ়ি তোলাৰ চেষ্টা অব্যাহত ৰাখিছে বুলি শুকুৰবাৰৰ সংবাদ মেলত চেতিয়াই উল্লেখ কৰে।
ইতিমধ্যে কেন্দ্ৰৰ পৰা এখন জাননী পোৱা বুলি সদৰী কৰি চেতিয়াই কয়, “মই অস্ত্ৰবিৰতিৰ নীতি-নিয়ম উলংঘা কৰা বুলি আজিৰ পৰা ডেৰ মাহ আগতে এই জাননীখন আহিছিল। আমাৰ ইচ্ছা থাকিলেও কিছু ক্ষেত্ৰত আমি আগ বাঢ়ি যোৱাত আমাৰ অসুবিধা আছে।”
ইফালে, আলফাৰ মাজত বিভাজন হোৱা কথাটো মিছা বুলি কৈ চেতিয়াই লগতে কয়, “নিজৰ মনৰ ক্ষোভবোৰ প্ৰকাশ কৰা মানে বিভাজন নহয়”।
“হৰি শংকৰ ব্ৰহ্ম কমিটীৰ প্ৰতিবেদনৰ কথাটো দুখজনক। তেওঁলোকে ৬-৭জন মানুহ ঐক্যবদ্ধ হৈ এখন প্ৰতিবেদন দিয়াহেঁতেন ভাল আছিল। দুখন প্ৰতিবেদন দিয়াটো দুৰ্ভাগ্যজনক বুলি আমি কওঁ।” চেতিয়াই কয়।
আনহাতে, সেই একেখন সংবাদমেলতে উপস্থিত থকা অৰবিন্দ ৰাজখোৱাই জিতেন দত্তৰ হুংকাৰৰ মন্তব্য প্ৰকাশ কৰি কয়, “পূৰ্বতে যিদৰে কেন্দ্ৰৰ সৈতে মতৰ বিভেদ হোৱাৰ বাবেই আমি হাতত অস্ত্ৰ তুলি লৈছিলো, ঠিক তেনেকুৱা এটা অৱস্থাৰে আকৌ সৃষ্টি হ’বলৈ গৈ আছে। এনেকুৱা ধৰণৰ পৰিস্থিতিত এনেকুৱা মন্তব্য কৰাটো স্বাভাৱিক কথা। ৰাষ্ট্ৰ ব্যৱস্থাটোৱে আমাৰ মাজলৈ এই পৰিস্থিতিটো থেলি দিছে। এনে পৰিস্থিতিত ক্ষোভৰ সীমা চেৰাই গ’লে এনেকুৱা ধৰণৰ মন্তব্য কৰিব পাৰে। অস্ত্ৰবিৰতি ঘোষণা কৰিছো যদিও আমি কথা ক’বলৈ এৰি নিদিও, আমি প্ৰতিবাদ কৰিয়েই যাম।”
