ৰাজ্যত সংঘটিত হোৱা কয়লা কেলেংকাৰিৰ বিৰুদ্ধে তদন্ত ক্ষীপ্ৰতৰ কৰি তোলাত নিতৌ ন ন তথ্য পোহৰলৈ অহাৰ লগতে চি আই ডিৰ জালত পৰিছে বহুতো চৰকাৰী বিষয়া। ঠিক সেইদৰে মঙলবাৰে চি আই ডিৰ এটা দলে প্ৰায় এক ঘণ্টা সোধা পোছাৰ অন্তত কয়লা কেলেংকাৰিত জড়িত থকা সন্দৰ্ভত গ্ৰেপ্তাৰ কৰে শিলচৰৰ ৫ গৰাকীকৈ চৰকাৰী শীৰ্ষ বিষয়াক।
গ্ৰেপ্তাৰ হোৱা বিষয়াকেইজন হ’ল শিলচৰৰ কৰ অধীক্ষক সজল দাস, কাটিগৰাৰ চক্ৰ বিষয়া মনজুৰ ইলাহী বৰভূঞা, শিলচৰৰ কৰ পৰিদৰ্শক অঞ্জনজ্যোতি বৰা, শিলচৰৰ এনফ’ৰ্চমেণ্ট পৰিদৰ্শক বিশ্বজিৎ ভট্টাচাৰ্য আৰু এনফ’ৰ্চমেণ্টৰ সহকাৰী পৰিদৰ্শক বাবুল মান্দা।
এই গ্ৰেপ্তাৰ সন্দৰ্ভত চি আই ডিৰ এজন তদন্তকাৰী বিষয়াই কয় যে আমি কয়লা কেলেংকাৰী সন্দৰ্ভত বৰাকৰ বিভিন্ন অঞ্চলত কৰা তদন্তৰ সময়ত কয়লা মাফিয়াৰ সৈতে কিছু চৰকাৰী বিষয়া জড়িত থকাৰ তথ্য লাভ কৰিছিলো। আৰু এই তথ্যৰ ভিত্তিতে আমি তেওঁলোকক কালি সোধা পোছা কৰো আৰু অৱশেষত গ্ৰেপ্তাৰ কৰো।
উল্লেখ্য যে কয়লা কেলেংকাৰি সন্দৰ্ভত গ্ৰেপ্তাৰ হোৱা শিলচৰৰ আটাইকেইজন চৰকাৰী শীৰ্ষ বিষয়াকে আজি গুৱাহাটীৰ বিশেষ আদালতত হাজিৰ কৰোৱা হ’ব।
বুধবাৰে শিলচৰৰ ৫ গৰাকীকৈ চৰকাৰী শীৰ্ষ বিষয়াক গ্ৰেপ্তাৰ কৰাৰ পিছত আজি চি আই ডিয়ে ৰাতিপুৱাৰে পৰা কাছাৰৰ আন এজন কৰ অধীক্ষক সৌৰভ দাসক মাৰাথন জেৰা অব্যাহত ৰখা বুলি জানিব পৰা গৈছে। লক্ষ্যণীয় যে কয়লা কেলেংকাৰি সন্দৰ্ভত আৰু অধিক চৰকাৰী বিষয়া চি আই ডিৰ জালত পৰা সম্ভাৱনাই গা কৰি উঠিছে।
