মেঘালয়ত কয়লা খননৰ ক্ষেত্ৰত ৰাষ্ট্ৰীয় সেউজ ন্যায়াধিকৰণৰ নিষেধাজ্ঞাৰ বৰ্তমান স্থিতি সন্দৰ্ভত চালি-জাৰি চোৱা আৰু ভৱিষ্যতৰ বাট উলিওৱাৰ প্ৰতিশ্ৰুতি দিছে ৰাজ্যৰ মুখ্য মন্ত্ৰী কনৰাদ চাংমাই।
মেঘালয়ৰ কয়লা খনি মালিক আৰু ব্যৱসায়ীসকলৰ ফ’ৰাম (State Coordination Committee of Coal Owners and Mine Dealers Forum)ক আজি মঙলবাৰে মুখ্য মন্ত্ৰীগৰাকীয়ে এই আশ্বাস প্ৰদান কৰে বুলি আজি এন ই নাওলৈ প্ৰেৰণ কৰা প্ৰে’ছ বাৰ্তাত কোৱা হৈছে।
গোটেই বিষয়টো চালি-জাৰি চোৱাৰ বাবে খনি আৰু নৃতত্ব, আইন, পৰিৱেশ আৰু গৃহ বিভাগৰ মন্ত্ৰীসকলক লৈ এক মন্ত্ৰী দল গঠন কৰা হ’ব বুলি প্ৰতিনিধি দলটোক মুখ্য মন্ত্ৰীয়ে আশ্বাস দিয়ে।
কনৰাদ চাংমাই কয়, ‘আমি বিষয়টো বুজিছো আৰু ইয়াক আগবঢ়াই নিয়াৰ বাবে সকলো পক্ষৰ মতামত লৈ এক মাষ্টাৰ প্লেন প্ৰস্তুত কৰা হ’ব। কয়লাৰ বিষয়টো আমাৰ চৰকাৰে অগ্ৰাধিকাৰ দিছে। কেন্দ্ৰৰ লগতে আন সংশ্লিষ্ট কৰ্তৃপক্ষসমূহৰ সৈতে আমাৰ আলোচনা আগবঢ়াই নিওঁতে পৰিৱেশ সংক্ৰান্তীয় উদ্বিগ্নতাসমূহৰ কথাও আমি চাম।’
