সাৰ্বভৌম অসমৰ স্বপ্নেৰে সংগ্ৰাম আৰম্ভ কৰা কেইবাজনো আলফা নেতাই এতিয়া বহিৰাগতৰ পৰা অসমৰ ব্যৱসায় খিলঞ্জীয়া যুৱকৰ হাতলৈ অনাৰ বাবে অৰ্থনৈতিক সংগ্ৰামৰ পথ বাচি লৈছে।
প্ৰাৰম্ভিক অৱস্থাত কণীৰ ব্যৱসায়ত অসমৰ খিলঞ্জীয়া যুৱকক নিয়োজিত কৰাৰ ব্যৱস্থা কৰিছে আলোচনাপন্থী আলফা নেতা জিতেন দত্ত, অনুপ চেতিয়া, প্ৰবাল নেওগ, অন্টু চাওদাং আৰু মৃণাল হাজৰিকাই।
অন্ধ্ৰ প্ৰদেশৰ পৰা দুই ট্ৰাক কণী আনি অসমৰ প্ৰতিখন সৰু-বৰ চহৰত খিলঞ্জীয়া যুৱকসকলক ব্যৱসায়ৰ বাবে যোগান ধৰিছে আলফা নেতাকেইজনে গঠন কৰা অসম সুৰক্ষা আৰু উন্নয়ন পৰিষদ নামৰ গোটটোৱে।
‘অসমৰ ক্ষুদ্ৰ ব্যৱসায়সমূহ সম্পূৰ্ণ মিঞাৰ দখলত আছে আৰু বহিৰাগতই ইয়াত চিণ্ডিকেট চলাই আছে। আমাৰ লক্ষ্য এই চিণ্ডিকেটবোৰ ভাঙি দিয়া আৰু আমাৰ ল’ৰাক ব্যৱসায়ত সুমুৱাই দিয়া। যিবোৰ ব্যৱসায় বহিৰাগতৰ দখলত আছিল তাত আমাৰ অসমীয়া যুৱশক্তি জড়িত কৰি অসমীয়া মানুহৰ দখললৈ অনাৰ বাবে প্ৰচেষ্টা হাতত লৈছো,’ আলফা নেতা জিতেন দত্তই নৰ্থ ইষ্ট নাও-ক জনায়।
বহিৰাগতসকলক ব্যৱসায়ত কোনো বাধা দিয়া নহয় বুলিও দত্তই ঘোষণা কৰিছে। ‘বজাৰৰ অন্ততঃ ২০ শতাংশ ব্যৱসায় খিলঞ্জীয়া যুৱক-যুৱতীক দিবই লাগিব। বাকী ৮০ শতাংশত আন ব্যৱসায়ীসকলে ব্যৱসায় কৰি থাকক,’ জনালে দত্তই।
অৰ্থনৈতিক সংগ্ৰামখন আগুৱাই নিয়াৰ বাবে কেৱল কণীয়েই নহয়, মাছকে ধৰি বিভিন্ন ক্ষুদ্ৰ ব্যৱসায় অসমীয়াৰ হাতলৈ নিয়াৰ পৰিকল্পনা হাতত লৈছে অসম সুৰক্ষা আৰু উন্নয়ন পৰিষদে।
এতিয়া অন্ধ্ৰ প্ৰদেশৰ পৰা কণী অনা হৈছে যদিও অসমতে ক্ষুদ্ৰ ক্ষুদ্ৰ গোটত কণীৰ উৎপাদন আৰম্ভ কৰিছে বুলিও জীতেন দত্তই জানিবলৈ দিয়ে।
কণীৰ ব্যৱসায়ৰ লগতে উৎপাদনৰো পৰিকল্পনা আছে বুলিও দত্তই ঘোষণা কৰে। ‘কণীৰ উৎপাদন আৰম্ভ হৈছে যদিও বজাৰ দখল কৰাত যথেষ্ট অসুবিধা হৈছে। কিয়নো গোটেই বজাৰ মিঞাৰ দখলত আছে। গতিকে আমি বৃহৎ হাৰত উৎপাদন কৰাৰ আগতেই অসমৰ যুৱক-যুৱতীক ব্যৱসায়ত নিয়োজিত কৰি বজাৰখন খিলঞ্জীয়াৰ হাতলৈ আনি ল’ব বিচাৰিছো। আমি একে সময়তে ব্যৱসায়ৰ জৰিয়তে বজাৰত অসমৰ যুৱকক সুমুৱাই দিম আৰু সেই একেটা সময়তে উৎপাদন প্ৰক্ৰিয়াও আগবঢ়াই নিয়াৰ পৰিকল্পনা কৰি যাম’, জিতেন দত্তই কয়।
